Алғаш рет Орта дәліз бойынша кері жүктеу ұйымдастырылды: Контейнерлік пойыз Түркиядан Қазақстан арқылы Қытайға жөнелтілді.

Бұл жұмыс «Қазақстан темір жолы» ҰК» АҚ-ның еншілес ұйымы — «KTZ Express» АҚ мен түркиялық Pasifik Eurasia Lojistik Dış Ticaret A.Ş. компаниясының бірлесуімен жүзеге асырылды, деп хабарлайды Rail-news.kz.

Контейнерлік пойыз Транскаспий халықаралық көлік бағыты (ТХКБ) бойынша Измир (Түркия) – Ақтау порты – Алтынкөл станциясы – Чэнсян (Сычуань провинциясы, Қытай) жүріп өтті. Пойыз құрамында тұрмыстық тоңазытқыштары бар 50 қырықфуттық контейнер жөнелтілді. Қазақстан Республикасының аумағы арқылы Ақтау порты– Алтынкөл станциясы бағыты бойынша транзит уақыты 83 сағатты құрады. 

Жобаны іске асыру Орта дәліздің шығыс бағытта – Түркия мен Еуропа елдерінен Қытайға тасымалдауды ұйымдастыру үшін тиімді әрі бәсекеге қабілетті шешім ретінде өсіп келе жатқан сұранысын растайды.

Еске салайық, 2025 жылдың қорытындысы бойынша Қазақстан мен Түркия арасындағы тасымал көлемі 34%-ға артты.