Қазақстан астық пен ұн экспортын жаңа бағытқа бұрмақ

Қазақстанның астық өңдеушілер одағы ұн мен астық экспортын Түрікменстан арқылы тасымалдауды күшейтіп, Болашақ стансасында логистикалық кешен салуды ұсынды. Бұл туралы Қазақстан жүк теміржол тасымалдаушылары қауымдастығы мәлімдеді, деп хабарлайды Rail-news.kz.

Одақтың мәліметінше, қазір Қазақстан өнімдерінің, оның ішінде астық пен ұнның негізгі бөлігі Ауғанстан бағытына Өзбекстан арқылы жеткізіледі. Алайда бұл бағыттағы транзит құны бір тоннаға шамамен 55 долларды құрайды. Ал Түрікменстан арқылы тасымалдау құны шамамен 47 доллар.

Сала өкілдерінің есебінше, осының арқасында әр тоннадан 8 долларға дейін үнемдеуге болады. Егер жылдық тасымал көлемі 1–2 млн тонна болса, жалпы үнем 8–16 млн долларға жетуі мүмкін.

Сонымен қатар, қазіргі уақытта Түрікменстан бағыты шектеулі деңгейде қолданылып отыр. Бұған Болашақ стансасындағы логистикалық инфрақұрылымның жеткіліксіздігі мен шекаралас аумақтардың техникалық мүмкіндіктерінің әлсіздігі себеп екені айтылды.

Осыған байланысты астық өңдеушілер одағы Болашақ стансасында заманауи көпфункционалды логистикалық-ауысу кешенін құруды ұсынып отыр. Жоба аясында ұн мен қайта өңделген өнімдерді тиеу инфрақұрылымы, сұйық жүк терминалдары, контейнер алаңдары, уақытша сақтау қоймалары және кедендік-цифрлық жүйелер салу жоспарланған.

Сондай-ақ құжатта Қазақстан – Түрікменстан – Ауғанстан – Иран бағытын дамыту экспорт географиясын кеңейтіп, жекелеген транзиттік елдерге тәуелділікті азайтатыны атап өтілген.