ҚТЖ Қазақстан арқылы Қытай мен Мәскеу торабы арасында жаңа тұрақты айналмалы рейс сервисін іске қосты
«KTZ Express» АҚ («Қазақстан темір жолы» ҰК» АҚ еншілес компаниясы) Қытай – Қазақстан – Ресей (Мәскеу көлік торабы) – Қазақстанның солтүстік станциялары – Қытай бағыты бойынша жаңа тұрақты айналмалы рейс сервисін іске қосты, деп хабарлайды Rail-news.kz.
Жаңа логистикалық сервис контейнерлік паркті пайдалану тиімділігін арттыруға, экспорттық тасымалдарды дамытуға және Қазақстан аумағы арқылы өтетін транзиттік көлемдерді ұлғайтуға бағытталған.
Жоба Қытай мен Ресей арасындағы транзиттік тасымалдарға, сондай-ақ қазақстандық астық өнімдерін Қытайға экспорттауға деген сұраныстың артуына жауап ретінде іске асырылды.
Логистикалық схема жүк тиелген контейнерлік пойыздарды Қытайдан Қазақстан станциялары арқылы Мәскеу көлік торабына жеткізуді көздейді. Жүк түсірілгеннен кейін контейнерлер Қазақстанның солтүстік станцияларына бағытталып, онда астық дақылдары қайта тиеледі де, Қытайға жөнелтіледі.
Толық айналмалы рейстің орташа мерзімі шамамен 20 тәулікті құрайды. KTZ Express контейнерлік жабдықты ұсынуды және бүкіл маршрут бойынша логистикалық процестерді үйлестіруді қоса алғанда, тасымалды кешенді сүйемелдеуді қамтамасыз етеді. 2026 жылғы сәуір-маусым аралығында жаңа сервис аясында 13 контейнерлік пойыз, яғни 1600 ЖФЭ жөнелтілді.
Жаңа сервис контейнерлердің бос жүрісін қысқартуға, жылжымалы құрамды пайдалану тиімділігін арттыруға, қазақстандық астықтың Қытайға экспортын қолдауға және Солтүстік дәліз бойынша тасымал көлемінің қосымша өсуін қамтамасыз етуге мүмкіндік береді. KTZ Express нарық қажеттіліктеріне сәйкес тасымал көлемін кезең-кезеңімен ұлғайтуды жоспарлап отыр.