Теміржол тәжірибесі сөз болды
«Қазақстан теміржолшысы» газетінің тілшісі
Қазақстанда көктемгі су тасқыны еліміз үшін жыл сайын сынаққа айналуда. Бұл тақырып жуырда «МАГИСТРАЛЬ-LIVE» алаңында көтерілді.
Өткен жылы су тасқыны еліміздің көптеген өңірлеріне орасан зор залал келтіргені белгілі.
«Ерекше атап өтетіні, стихиялық жағдайларға қарамастан, теміржол төсемін су басудың бірде-бір жағдайы тіркелген жоқ. Бұл – сауатты дайындықтың, қызметтер мен жоғары жауапкершілік арасындағы үйлесімді өзара іс-қимылдың нәтижесі», – деді эфирге қатысқан Парламент Мәжілісінің депутаты Мұрат Әбенов.
Ол болашақта осындай төтенше жағдай салдарын барынша азайту үшін барлық басқа жергілікті атқарушы органдарға теміржолдағы тәсілді қолдануды ұсынды.
Магистральдық желі дирекциясы Жасанды құрылыстарды жөндеу жөніндегі функционалдық бағытының бас менеджері Ардақ Төлеуғалиев өткен жылғы оқиғалар инфрақұрылымдағы осал тұстардың өзіндік индикаторы болғанын атап өтті.
«Соның негізінде компанияның тиісті құрылымдарын ауқымды жаңғырту жұмыстары жүргізілді. Бөлімшелер заманауи жабдықтармен қамтамасыз етілді, атап айтқанда соңғы үлгідегі жарық діңгектері, шағын механикаландыру техникалары, сорғылар алынды», – деді ҚТЖ өкілі.