ҚТЖ және SPSI Cloud Port Development агрологистика саласындағы ынтымақтастықты нығайтуда

Астанада «Қазақстан темір жолы» ҰК» АҚ Басқарма Төрағасы Талғат Алдыбергеновтың SPSI Cloud Port Development Co., Ltd Басқарма Төрағасы Хуан Сянмен (ҚХР) жұмыс кездесуі өтті, деп хабарлайды Rail-news.kz.

Келіссөздер барысында тараптар «Кедентранссервис» АҚ (ҚТЖ еншілес компаниясы) мен Қытайдың SPSI Cloud Port Development мемлекеттік холдингінің стратегиялық әріптестігі шеңберінде іске асырылып жатқан Көкшетау қаласында заманауи агрологистикалық хаб салу жөніндегі инвестициялық жобасы барысын талқылады.

Жоба Көкшетау қаласында жобалық қуаты жылына 1 млн тоннадан асатын 40 гектар аумақта заманауи логистикалық кешен құруды көздейді. Бастама шеңберінде контейнерлік, теміржол және қойма инфрақұрылымын дамыту жоспарлануда, бұл Солтүстік Қазақстанның агроөнеркәсіптік кешені үшін тиімді логистиканы қамтамасыз етуге мүмкіндік береді.

Жаңа терминал ауыл шаруашылығы өнімдерін сақтауды, жүктерді шоғырландыруды және экспорттық нарықтарға жөнелту үшін контейнерлік пойыздарды қалыптастыруды қамтамасыз етеді. Жобаны іске асыру құрылыс кезеңінде 500 астам жұмыс орнын және объект пайдалануға берілгеннен кейін 100 жуық тұрақты жұмыс орнын ашады, сондай-ақ Ақмола облысының елдің негізгі агроэкспорттық өңірлерінің бірі ретіндегі позициясын күшейтеді.

Кездесу барысында Сычуань провинциясымен (ҚХР) және Батыс Қытайдың ірі экономикалық орталықтарының бірі Чэнду қаласымен логистикалық ынтымақтастықты дамытуға ерекше назар аударылды. Қазақстан мен Қытайдың батыс өңірлері арасында экспорттық-логистикалық қуаттарды арттыруға мүмкіндік беретін логистикалық хаб құру жайы қарастырылуда.

Тараптар бірлескен жобаларды іске асыру тұрақты логистикалық тізбектерді дамытуға және Қазақстан мен Қытай арасындағы сауда-экономикалық ынтымақтастықты одан әрі нығайтуға ықпал ететінін атап өтті.