ҚТЖ басшысы ҚХР технохабтарында болды

Қытай Халық Республикасына жұмыс сапары аясында «ҚТЖ» ҰК» АҚ Басқарма Төрағасы Талғат Алдыбергенов Ченду қаласына барып, теміржол саласын цифрлық дамыту мәселелері бойынша бірқатар кездесулер өткізді. Ченду Қытайдың Оңтүстік – Батысындағы көлік хабы болып табылады және де ол арқылы үлкен жүк пен жолаушылар ағыны өтеді, деп хабарлайды Rail-news.kz. 

Сапар барысында компания басшысы China State Railway Group Chengdu Bureau диспетчерлік орталығына барып, диспетчерлік реттеу жүйесін ұйымдастырумен, қозғалыс қауіпсіздігі мен тасымалдау процесінің үздіксіздігін қамтамасыз ететін жүк және жолаушылар пойыздары қозғалысын автоматты бақылау мен басқару жүйелерімен танысты.

Сапар Қытайдағы Көлік және логистика саласындағы ең көне университеттердің бірі болып табылатын Оңтүстік – Батыс көлік университетіне (құрылғанына 130 жыл) (Southwest Jiaotong University) барумен жалғасты. Бұл университет ғылыми-зерттеу жұмысы мен Қытай темір жолдары үшін инновациялық шешімдерді әзірлеу алаңы болып табылады. 

Талғат Алдыбергенов жоо басшылығымен кездесу өткізіп, университеттің оқу базасын аралап, осы университеттің теміржол көлігі саласында білікті кадрларды даярлау мен ғылыми ынтымақтастық мәселелерімен танысты, жалпы желілік, өңірлік және станциялық деңгейлерде теміржол тасымалдарын автоматты басқару жүйелерін әзірлеу мен тестілеу, сондай-ақ нақты кейстер мен тарихи деректер мысалында мамандарды қолданбалы оқыту жүргізілетін зертханаларға барды.

Сондай - ақ, зияткерлік ситуациялық орталықтар әзірлеушісі – Chengdu Sefon Software компаниясымен кездесу өтті. Тараптар жолаушылар және жүк пойыздарының инфрақұрылымы мен қозғалысын басқару тиімділігін арттыру мақсатында ҚТЖ ахуалдық орталығын құру үшін IOC шешімдерін қолдану мүмкіндіктерін талқылады. 

Сапар серіктестікті нығайтуға және «ҚТЖ» ҰК» АҚ қызметіне озық цифрлық шешімдерді енгізуге бағытталған.