Құрық пен Махачкала порттары ынтымақтастық туралы келісімге қол қойды
«Құрық порты» ЖШС өкілдері XXIX Санкт-Петербург Халықаралық экономикалық форумының (РФ) жұмысына қатысып, оның аясында «Құрық порты» ЖШС маркетинг және логистика жөніндегі атқарушы директоры Тұрлан Медина мен Махачкала портының бас директоры Жамал Әлиев Құрық пен Махачкала порттары арасында автопаром тасымалдарын ұйымдастыру бойынша ынтымақтастық туралы келісімге қол қойды, деп хабарлайды Rail-news.kz.
Қол қойылған келісімнің негізгі мақсаты Қытай – Орталық Азия – Түрікменбашы порты бағытынан Құрық (Қазақстан Республикасы) және Махачкала (Ресей Федерациясы) порттары арқылы өтетін бағытқа жүк ағындарын қайта бағдарлау болып табылады. Қол жеткізілген уағдаластықтарды іске асыру екі портты және көлік нарығына қатысушыларды дамыту үшін жаңа перспективалар ашатын тиімді логистикалық шешімдерді қалыптастыруға ықпал ететін болады.
Тараптар өзара тиімді ынтымақтастықты одан әрі кеңейтуге, оның ішінде Құрық және Махачкала теңіз порттары арқылы көлік бағдарын дамытуға қызығушылық білдірді. Бұл бағдар Еуропа мен Азия арасындағы жүк тасымалын ұйымдастыру үшін қосымша логистикалық мүмкіндіктер жасайды және халықаралық көлік байланыстарын нығайтуға ықпал етеді.
Естеріңізге сала кетейік, Құрық порты Каспий теңізінің шығыс жағалауында, Ақтау портының оңтүстігінде, Бекович Черкасский шығанағында орналасқан, ол тиеу-түсіру жұмыстарын, атап айтқанда вагондарды әкелу және шығару операцияларын жүзеге асыру үшін қолайлы ауа-райын қамтамасыз етеді. Паром кешені астықты, мұнай өнімдерін, тыңайтқыштарды, химиялық заттарды және басқа да жүк түрлерін ауыстырып тиеуге бағытталған.
Өз кезегінде, Махачкала порты (РФ) – Ресейдің Каспийдегі жалғыз мұз баспайтын және ең терең теңіз порты, Ресейдің оңтүстігіндегі көлік жүйесінің Орталық Азия, Күнгей Кавказ, Иран және Каспий маңы аймағының басқа елдерімен байланыстырушы буыны болып табылады. Қазіргі уақытта Махачкала ХТСП-да 12 айлақ, үш құрғақ жүк терминалы және жүктерді ауыстырып тиеу мен тасымалдау үшін көмекші флоттың төрт кемесі бар.