Нұрлы жол вокзалында ғимаратты салқындату бойынша қосымша шаралар қабылданады
Нұрлы жол вокзалында температуралық режим мен ауаны баптау жүйесінің жұмысы тексерілді. Күту залдары мен техникалық үй-жайлар қаралды, деп хабарлайды Rail-news.kz.
Тексеру қорытындысы бойынша ылғалдандыру функциясы бар қосымша 20 өнеркәсіптік желдеткішті орнату туралы шешім қабылданды. Вокзал бойынша кезекшілерге тәулік бойы температуралық режимді бақылау және жолаушылардың өтініштеріне жедел ден қою тапсырылды. Сондай-ақ, медицина қызметкерлерінің тәулік бойы кезекшілігі ұйымдастырылды.
Елордада қалыптасқан әдеттен тыс ыстық ауа-райы жағдайында ауаны баптау жүйесіне жүктеме айтарлықтай өсті.
Қосымша жүктеме Астана-1 вокзалын жаңғыртуға байланысты Нұрлы жол вокзалына 16 жолаушылар пойызын уақытша ауыстырумен байланысты. Нәтижесінде жолаушылар ағыны 23% өсті, бұл салқындату жүйесіне жүктемені де арттырды.
Компания жолаушылардан уақытша қолайсыздықтар үшін кешірім сұрайды және түсіністік білдіргендері үшін алғыс айтады.