Латвияда теміржол тасымалы басты жолаушылар көлігіне айналмақ
Латвияда ішкі жолаушылар тасымалын дамыту жобаларына 244,69 миллион еуро бөлінген. Бұл туралы аталған елдің байланыс министрлігі мәлімдеді, деп хабарлайды Rail-news.kz.
Мемлекет көліктерден ауаға бөлінетін зиянды қалдықтарды азайтатын экологиялық таза көлікті дамытуға бет бұрған. Темір жолдың қоғамдық көлік ретіндегі маңыздылығын көтере отырып, автокөлік иелері жайлы әрі жылдам жүретін электричкаларды таңдауына жағдай жасап жатыр. Бұл мақсатта Еуроодақтан бөлінген инвестиция да бар екен.
«Еуроодақтан бөлінген қаражат біздің қажеттілігімізді толықтай жаппаса да, біраз бөлігін қамтамасыз етті. Олар берген қаражатқа 23 жаңа электр пойызын сатып алдық. Бұл пойыздар Ригадан Елгава, Тукумс, Скулт және Айзкраукле бағытында жүретін болады. Жаңа пойыздар өте жайлы, оның үстіне велосипед, бала арбасы және ауыр жүкпен кіретін жолаушылардың қажеттіліктерін ескере білген. Вагондарда салқындатқыш, Wi-Fi және хабарландыру жүйелері орнатылған», – дейді Латвия байланыс министрлігі бас хатшысының орынбасары Лигита Ауструпе.
Теміржол инфрақұрылымын жаңғырту жобасы аясында 2023 жылдың соңына дейін 48 станцияда пандусы бар эстакадалар салу көзделген. Вокзалдарда жолаушыларды ескерту құрылғылары мен бейнекамералар, жарықтандыру, билет автоматтары қойылады.