Он сегізде от кешкен...

Маңғыстау локомотив пайдалану депосының ұжымы машинист, Ауған соғысының ардагері Асылбек Наурызбаевтың құрметіне шағын басқосу ұйымдастырды. Түбектегі машинистердің арасында «Танкист машинист» деп танылған ағамызды депо басшылығы мен кәсіподағы Кеңес әскерінің Ауғанстаннан шығарылған күнімен құттықтады.

Ауған жерінен әскерилердің шығарылғанына 36 жыл толуына орай 36 мың теңге қаржылай сыйлық пен Алғыс хат, Маңғыстау теміржолына 60 жыл төсбелгісін табыстады. Депо басшысының міндетін уақытша атқарушы Руслан Төлепбергенұлы мен кәсіподақ ұйымының төрағасы Әбілсейт Нәбиханов Ауған соғысының ардагерінің еңбегі туралы сөз етіп, өзінің әскери міндетін жат жұрттағы от майданда өтеп, ауған асуынан асқан ағамызға жылы лебізін арнады.  

Асылбек Наурызбаев небәрі 18 жасында Ауғанстандағы инернационал жауынгерлер қатарына қосылып, 65 753 полкінің танк батальонында қызмет етеді. Танк жүргізеді, әрі атқыш, әрі танк командирі рөлін атқарады. Бірнеше жауынгерлік операцияға қатысады.  

– Әкем ағаш шебері. Анам көп балалы ана. Осындай қарапайым жанұяда алты ұл, екі қыздың кенжесі болдым. Мектепті бітірген 1987 жылы әскерге кеттім. Түркіменстанның Тәжен қаласына алып барып, алты айлық әскери дайындықтан өткізді. Біз бастапқыда ол Ауғанстанға дайындайтын жер екенін де, бізді ол жаққа жіберу үшін оқытып жатқанын да білмедік. Онан соң полк командирінің бұйрығымен әр ротадан 35 баладан таңдап алды. Сол 35 жігіттің бірі мен едім. Жарты жылдық оқытудан соң бізді Ташқорған қаласына алып кетті. Танк батальонына түстім. Сол жерден өз борышымызды атқарып, түрлі жауынгерлік операцияға қатыстық. Біреуінде танк жарылып, жеңіл контузия алдым. Емделіп, қайта міндетімді жалғастырдым, – дейді машинист ардагер.

Асылбек аға отыз жылдан астам осы салада. Соның жартысынан астамы тепловоз рулінде. Теміржолдағы жұмысын 1990 жылы көрші елдегі Жаслық локомотив депосында слесарь болып бастапты. Екі айдаң соң деподағы оқу курсынан өтіп, машинист көмекшісі жұмысына ауысады. Кейін Ташкент қаласында бір жылдық машинист оқуын оқиды. Міндетін машинист болып жалғастырады. Қазақ теміржолындағы еңбек жолы 2002 жылы Маңғыстауға қоныс аударғаннан кейін басталады. Елге келе сала Маңғыстау локомотив пайдалану депосына көмекші машинист болып жұмысқа орналасады.