Қырық жыл кешіккен шындық
Ақтөбе облысы бойынша меншікті тілші
Дүйсенғали Бозжігітов - Ақтөбе қаласының тұрғыны. Атырау облысы Мақат ауданының тумасы. Біраз жыл теміржол саласында еңбек етті.
Осыдан қырық жыл бұрынғы оқиға оның өмірінің күл-паршасын шығарып, тағдырын шырғалаңға салған екен. Д. Бозжігітов 1984 жылы ҚазМУ-дың «Саяси экономика» мамандығы бойынша дайындық бөліміне тыңдаушылар құрамына қабылданады. 1985 жылы философия-экономика факультетінің күндізгі курс студенті атанып, студенттік өмірдің қызығы мен шыжығына ден қойған жас жігіт бір жылдан кейін болған атышулы Желтоқсан оқиғасы өмірін түбегейлі өзгертетінін әрине, білген жоқ.
Ол 1986 жылы Алматыдағы Желтоқсан оқиғасына қатысқан, сол кезде қуғын-сүргінге ұшыраған студенттердің бірі болды. 2 курс студенті “қоғамдық тәртіпті бұзды” деген айыппен университеттен оқудан шығарылған.
«1986 жылғы оқиғадан кейін еш жер жұмысқа алмады. Ауылыма бара алмадым. Осы Ақтөбеге келдім, содан осында тұрақтап қалдым. Темір жол саласында, депода слесарь болып жұмыс істедім, қиын қыстау күндері теміржолшылар демеу болды. Кейін үзіліп қалған оқуымды қайта жалғастырып, жоғары білім алдым, бірақ қанша жыл өмірім сергелдеңмен өтті»,– деп еске алады ол өткен күндерді.
Бүгінде 64 жастағы Дүйсенғали Бозжігітов 39 жылдан кейін өзіне заңсыз қысым жасалғанын дәлелдеп шықты. Ақтөбе соты 39 жыл бұрынғы оқиғаға қатысты қаулы шығарды. Сот оны Желтоқсан оқиғасының құрбаны деп таныды. Желтоқсаншы енді моральдық-материалдық шығын өндіру туралы азаматтық арыз дайындап жатыр.