Алғыс арқалаған жолсерік

«Жолаушылар тасымалы» АҚ «Экспресс» филиалының жолсерігі Қуатбек Дауылбаев – жеті жылдық тәжірибесі бар теміржолшы. Ол биыл 9 жасар кішкентай жолаушыға шұғыл түрде алғашқы медициналық көмек көрсетіп, баланың өмірін сақтап қалды.

Түркістан облысы Қазығұрт ауданы Айнатас ауылында туған Қуатбек Әмірұлы темір жолға кештеу келсе де жауапкершілігі мен сапалы қызметі үшін жоғары бағаға ие болып үлгерді. Ол бүгінде Алматы – Ташкент бағытындағы халықаралық пойызда жолсерік болып еңбек етеді.  

– Биыл 16 сәуірде Алматы-2 – Ташкент бағытындағы пойызда әдеттегі қызметіме кірістім. Екінші күні Келес станциясындағы шекаралық кеден тексеру нүктесінде сағат 11.30-дар шамасында менің вагонымда бір баланың жағдайы нашар екенін естідім. Шұғыл түрде балаға алғашқы медициналық көмек көрсетіп, тілін жұтып қоюына жол бермедім, басын көтеріп, сәл қапталға бұрдым, еркін тыныс алуына жағдай жасадым. Пойыз бастығы Сәуле Қыдырәлиева да көмекке келіп, дауысзорайтқыш радиобайланыс арқылы дәрігер іздеді. Жолаушылар арасында дәрігерлер жоқ болып шығып, жедел жәрдем шақырттық. Келес станциясындағы кезекші, медициналық қосын қызметкері мен Өзбекстанның шекаралық бақылау қосынының қызметкерлері де келді. Жедел жәрдем келгенше бала есін жиды. Анасының айтуынша, баланың бұлай құрысып қалуы бірінші рет, оны емдетуге апара жатыр екен. Сол жерден екеуі Ташкент ауруханасына жеткізілді, – дейді Қуатбек жолсерік.  

Баланың анасы жолсерікке кәсіби біліктілігі, адамгершілігі және жауапкершілігі үшін шын жүректен алғыс айтты. Өйткені дер кезінде сауатты медициналық көмек берілмесе, баланың жағдайы не болары белгісіз еді.  

Қызметін 2018 жылы компанияның «Солтүстік» филиалында бастаған Қуатбек Астана – Семей бағытында да жұмыс істеді. 2023 жылдан бастап қазіргі жұмысына, яғни «Экспресс» филиалының «Тальго» пойызына Алматы – Ташкент бағытына ауысты. Бүгінде екі елдің ортасында жүріп, жолаушылардың пойыздағы саяхаты кезінде жағдайын жасап, діттеген жеріне аман-есен жеткізу үшін қызметін жалғастырып келеді.