Парк кезекшісінің ерлігі

Жандос Бекжанұлы Жұмағазы - Қызылорда ЖТ бөлімшесіне қарасты Қызылорда станциясының парк кезекшісі. Ол қызметтік міндетін атқарып жүріп резервуардың жоғары клапанынан сығылған газдың ауаға тарап, ағып кетуін анықтап, төтенше апаттық жағдайдың алдын алып, ерлікке пара пар іс жасаған мақтаулы маман.

Бекеттің парк кезекшісі станция алқымындағы парк қауіпсіздігіне, кезекшілерге бекітіліп берілетін башмақтардың қайсысы қай жердегі жолда немесе вагон доңғалағына қойылғандығын білу, жауап беруге міндетті. Станция кезекшісінің МтиК пен бекітілген ДУ-61 формасы негізінде берілетін ескертпеге құлақ асуы шарт. Мұнда атқарылатын негізгі жұмыстардың нұсқасы көрсетіліп, оның негізінде локомотив бригадаларына нұсқамалар беріледі.  

Оқиға осы жылдың сәуір айында болған. Қызылорда станциясының жолында анықталған апатты жағдайда құзырлы органдар мен теміржолшылар бірлесіп жедел әрекет етіп, төтенше жағдайдың алдан ала білген.  

– Бекеттің оңтүстік алқымындағы 9-жолда №2626 жүк пойызынан ағытылып тұрған №57754855 нөмірлі цистернаның үстіңгі серіппелі сақтандырғыш клапанынан газдың ағып жатқанын байқап, жедел әрекет ету керектігін ұғындым. Әдетте пойыз тоқтағаннан кейін вагон құрамдарынан, негізінен астынан түрлі дыбыс естіледі. Алайда бұл дыбыс күнделікті еститін дыбыстарға ұқсаңқырамайды. Вагон-цистернаға зер сала қарасам, газдың пышылдаған дыбысы цистернаның үстіңгі жағынан үздіксіз дыбыспен, тұрақты қысыммен шығып тұр екен. Дереу дабыл қағып төтенше жағдай жөнінде бірден станция кезекшісі Рүстем Құрманғазиевқа хабар бердім. Өз кезегінде ДС Қ.Төрединов оқиға туралы Қызылорда облысының Төтенше жағдайлар департаментіне хабарлады, – дейді парк кезекшісі Жандос Бекжанұлы.  

«Қызылорда Газ» мекемесінің арнайы мамандары газ қауіпсіздігі бойынша тиісті жұмыстарға жедел кірісіп, апаттың алдын алуға барлық жағдай жасалған.Қауіптің ауқымын шектеу, адам шығыны мен инфрақұрылымға зақым келуінің алдын алу мақсатында ДС бұйрығымен пойыздардың қабылдау, жөнелту және маневрлік жұмыстар уақытша тоқтатылған.  

– Бекет жолына келіп тоқтаған жүк вагоныннан газдың ағуы-апатты жағдай. Жағдайдың күрделілігі мен қауіптілігін ескере отырып, сағат 16:05-те депо машинисі М. Файзуллаев пен пойыз құрастырушы Н. Шукенов ТЭМ2 маневрлық тепловозының көмегімен аталған цистернаны бекеттің қауіпсіз аумағындағы жолға шығарды. Мұнда апаттық картаға сәйкес шаралар қабылдануы үшін арнайы қауіпсіздік аймағы ұйымдастырылды. Арнайы шақырылған мамандардың сараптамалық жұмыс жасалды. Парк кезекшісі Жандос Жұмағазы-өз ісіне адал, өте ұқыпты және жауапкершілігі мол маман. Апаттың алдын алуда оның дер кезінде шешім қабылдап, тиісті құрылымдарға жедел хабар беруі-нағыз теміржолшыға тән қасиет, – дейді станция бастығы Қайрат Төрединов.  

Қызылорда станциясында орын алған бұл оқиғада парк кезекшісінің қырағылығы мен кәсіби біліктілігінің арқасында апаттың алды алынды. Барлық тиісті құрылымдардың шұғыл әрекет етуі, апаттық жағдайларды жою алгоритмдерінің нақты орындалуы арқасында адам өмірі мен инфрақұрылымға зақым келмеді. Бес жылдан астам тәжірибесі бар маманның әрекеті ерлікке пара пар бағаланды. Айтпақшы, Жандостың әкесі Бекжан, атасы Жұмағазы да аймаққа абыройлы теміржолшылар болды.