Ақмаралдың алғашқы жеңісі
"Қазақстан теміржолшысы" газетінің Жамбыл облысындағы меншікті тілшісі
«Жұмысшы мамандықтар жылы» Жамбыл жүк тасымалы бөлімшесіне қарасты Шу локомотив пайдалану депосының жылдамдық өлшегіш таспаларды тарқату инженері Ақмарал Жақаева үшін табысты болды.
Он төрт жылдан бері теміржол саласында білімі мен біліктілігін қатар шыңдап, абыроймен еңбек етіп келе жатқан ол жуырда Астана қаласында өткен «Жас үздік маман-2025» республикалық байқауында үздіктер қатарынан көрініп, 3-орынды олжалап оралды.
Жоғары оқу орнын бітірген дипломды маман еңбек жолын қарапайым нарядшыдан бастаған. Одан кейінгі жылдарда аспапшы-слесарь, ГСМ есебінің технигі болып түрлі бағытта жұмыс істеген Ақмарал Жақаева үш жылдан бері таспаларды тарқатушы инженер болып қызмет атқарып келеді.
– Темір жол – елдің күретамыры, бұл саладағы кез келген жұмыс үлкен жауапкершілік пен дәлдікті талап етеді. Әр жылдарда атқарған қызметтерім маған жауапкершілік пен ұқыптылықты үйретті. Мұндай қасиет әсіресе таспаларды тарқатушы маманға аса қажет. Біздің жұмысымыз күн сайын теміржол қозғалысының қауіпсіздігін қамтамасыз етумен тікелей байланысты. Сондықтан әр дерек пен мәліметті мұқият талдап, дұрыс қорытынды шығаруға тиіспіз, – дейді Ақмарал Есімханқызы.
«Жас үздік маман» байқауының жүлдесі оның теміржол саласындағы алғашқы жеңісі екен. Білім мен біліктілік сынға түскен жарыс жас инженер үшін үлкен тәжірибе мектебі болыпты.
– Байқау жоғары деңгейде ұйымдастырылды. Қатысушылар өз саласы бойынша білімін, тәжірибесін және кәсіби шеберлігін көрсетті. Мұндай байқаулар жас мамандарды шыңдайды, ізденуге, өз-өзін дамытуға және кәсібіне деген сүйіспеншілікті арттыруға үйретеді. Алдағы уақытта өзімді одан әрі жетілдіріп, теміржол саласының дамуына үлес қосуды мақсат етемін, – дейді Ақмарал.
Ақмарал Есімханқызының өмірде жасаған ең маңызды қос таңдауы да темір жолға қатысты екен. Жұбайы машинист, екеуі бүгінде төрт бала тәрбиелеп отыр.