Вокзал дикторының хоббиі

Тоғыз жолдың торабында орналасқан Арыс станциясындағы вокзалдың анықтама кезекшісі әрі дикторы Ұлбала Оразбекова – он саусағынан өнері тамған шебер. Өзі бұл жұмыстан тыс кезде айналысатын сүйікті хоббиім дейді.

1972 жылы бұрынғы Оңтүстік Қазақстан облысы Мақтаарал ауданында 11 балалы шаңырақта дүниеге келген Ұлбала Мүсілімқызының алғашқы мамандығы – тігінші. Қолы шебер анасынан дарыған бұл өнерге ол бала кезден бейім болды. Сөйтіп мектеп бітірген бойда тігіншілік курсын оқып, фабрикада жұмыс істеді. Сөйтіп жүргенде елде нарықтық өтпелі кезең басталып, фабрика жабылып, тұрмысқа шыққан кезінде жұмыссыз қалады. 2005 жылы Таразда педагогикалық жоғары білім алып, 5 жыл мектепте сабақ берді. Алайда балалары кішкентай, мектептің жүктемесі ауыр болып, ол Арыстағы жергілікті колледжден теміржол саласы бойынша арнаулы білім алып, вокзалға жұмысқа кіреді. Оған бұл жұмысы ауысымдық болғандықтан ыңғайлы еді әрі еңбек етіп, әрі отбасына қарауға қолайлы болды. Міне, содан бергі 16 жылда анықтама кезекшісі, диктор болып еңбек етіп келеді.  

 – Диктор болуға әдемі, ырғақты дауыс керек. Вокзал дикторы өзі жадынан ештеңе айтпайды, басшылық, яғни Магистральдық желі бөлімшесі бекіткен мәтіндерді оқимыз. Ол тек пойыздардың келуі мен кетуін хабарлаудан ғана емес, кейде мерекелерде халықты құттықтау, қауіпсіздік ережелерін айтудан да тұрады. Оның әрбір сөзі, үтір, нүктесіне дейін бекітіліп келеді. Ал анықтама кезекшісі адамдармен сыпайы сөйлесіп, сұрағына толымды жауап қатуы, оларға бәрін түсіндіріп, залдағы жолаушыларға барлық ақпаратты беруі қажет. Өзіме бұл жұмысым қатты ұнайды, күн сайын адамдармен сөйлесіп, олардың қажетін өтеп, ризашылығын алғанға не жетсін, – дейді теміржолшы келіншек.  

       Осындай қауырт жұмыстан қолы қалт еткенде Ұлбала Мүсілімқызы бала кезден бойына сіңген қолөнерімен айналысып, түрлі құрақ көрпелер, жамылғылар, қыз жасауын тігеді. Көбіне оларды сыйлап жібереді немесе жақын таныстарының сұранысымен тігеді.  

– Қолөнермен айналысқаннан демаламын. Бұл бір ғажап өнер ғой. Әдемі түрлі маталарды қиып, оюлап, бір әсем бұйым шығарып, көрген көз қуанатындай дүние жасайсың. Тігу техникасын мен кәсіби тұрғыда оқығандықтан әрбір жасаған көрпе, төсегім бәрінің көңілінен шығады. Олар риза болса, мен де марқайып қаламын, – дейді өнерлі вокзал дикторы.  

Егер сіз Арыс вокзалына жолыңыз түсіп, пойыздың келген-кеткенін хабарлап отырған әсем дауысты дикторды естісеңіз, ол біздің кейіпкеріміз Ұлбала деп біліңіз.