Темірден түйін түйген

Бұрын маңдай тер, білек күшімен атқарылатын көп жұмысты қазір техника атқаратын заманға жеттік. Темірден түйін түйген ұсталар мен зергерлер бүгінде жоқтың қасы. Десек те, маңғыстаулық темір ұстасы Еркін Майлановтың жұмысын көріп, бүгінгінің алтын қолды шебері осы шығар дедік.

Бейнеу жол дистанциясында темір ұстасы міндетін атқаратын ол әкеден көргенін істеп, темірден түйін түйетін хас шебер. Жол шаруашылығына қажетті құрал-саймандарды жөндеп, жамап-жасқап, станогы бір тыным таппайды. Жолшылардың балғасы мен ломы, басқа да қажетті сайманы істен шығар болса, ешкім жаңасын күтіп қол қусырып отырмайды. Еркіннің қолына түсіп, станогына жетсе болды, қайта түлеп, су жаңа болып шыға келеді. Онсыз мекемеде сынған техника тоқтап, бүлінген құрал құнын жоғалтады.

Мұнысын ұжымы да жоғары бағалайды. «Ерекеңнің еңбегі мықты, бір өзі тұтас мекеменің қажетін өтеп, қанша экономикалық пайда мен үнем әкеліп отыр» дейді басшылық.  

– Әкем 1982 жылы Бейнеу жол дистанциясына темір ұстасы болып жұмысқа орналасқан. Содан тапжылмай бір жерде жиырма жыл еңбектенді. Мен де сол кісіден көріп, қасында жүріп кәсібін үйрендім. Қызған темірмен жұмыс істеу оңай емес, қара күшті, төзімді талап етеді. Әкемнің кейінгі жылдары денсаулығы сыр бере бастады. 2002 жылы қатты ауырып, жұмыстан шықты. Орнына мен жұмысқа келдім. Жаспын. Біраз жыл қасында жүріп жинаған тәжірибем бар. Тапсырылған міндеттерді атқаруды бұрыннан да көріп жүргесін онша қиынға соққан жоқ. Үйде ес білгелі әкемнің токарлық станогында жұмыс істеп үйренгенім бар, игеріп кеттім. Жұмыс ауыр әрине. Бірақ ауырлығына қарамастан әкеміз бізді, он бір баланы осы темірмен жұмыс істеп жүріп-ақ жеткізді. Қазір өзім де осы кәсібімнің арқасында төрт баламды өсіріп, отбасын асырап отырмын, – дейді темір ұстасы Еркін Табылғанұлы.  

Темір балқытатын көрігін қыздырып, тарс-тұрс ұрғылап, істен шыққан қаншама нәрсеге қайта жан бітіретін шебер жұмыста болттарды бұрайтын кілттерді жасау, сынған болт, гайка, сүймен, балға сияқты қажетті құралдарды құю мен жөндеуден басқа, үйдегі станокта ауылдастарының көлігіне, тұрмыста қажетті саймандарына жөндеу жүргізіп, темір бұйымдарын жонып, дәнекерлеп, жөндеп береді.