Сайөтесте вагон қараушы апатқа жол бермеді
Маңғыстау облысы бойынша меншікті тілші
Сайөтес станциясындағы вагондарға техникалық қызмет көрсету пунктінің вагон қараушысы Еділ Дабысбаев қауіпті ақауды анықтады.
1-ші шілде күні кезекті ауысымдағы жұмысын атқарып жүрген 5-дәрежелі вагон қараушы-жөндеуші Маңғыстау бағытынан келген құрамның вагон доңғалағынан оғаш дыбыс естиді. Темірге балғамен соққан дыбыстан «диагноз» қойып үйренген жігіт тізбекте төртінші тұрған 94299658 нөмірлі вагонда бұл тарсылдың өзгешелеу естілгенін байқайды. Анықтап қарап, букс торабының салқын күйде ығысуын байқайды. Тиісті басшылардың қатысуымен тексере келе букс торабы 17 мм ығысқаны белгілі болды.
– Бұл ақаулық мінездемесі бойынша қозғалыс қауіпсіздігіне қауіп төндіріп, вагонның жолдан шығуына әкелуі мүмкін қауіпті ақауға жатады. Вагон дереу құрамнан ағытылып, жөндеу тұйығында жұп доңғалағы ауыстырылады. Вагон Маңғыстаудан Алтынкөлге бара жатқан, жүксіз жайдақ вагон еді. Еділ Дабысбаев бізде 2022 жылдан бері жұмыс істейді, тәжірибесі толысып келеді, өте қырағы жігіт, бәрін байқайды, бүгін міне, қауіпті ақауды анықтап отыр, – дейді Сайөтес техникалық қызмет көрсету пунктінің басшысы Манарбек Жаңбырбаев.