Үздік атанған үштік
Маңғыстау облысы бойынша меншікті тілші
Түбек теміржолының үш жігіті «Жаңа Қазақстан» республикалық инновациялық орталығының ұйымдастырған «Адал адам – Адал еңбек – Адал табыс» форумы аясында өткен «Үздік теміржолшы-26» республикалық байқауының жеңімпазы атанды.
Тәуелсіздіктің 35 жыл толуына орай ел игілігі жолында табанды қызмет етіп, жоғары кәсіби шеберлігімен теміржол саласының дамуына елеулі үлес қосып жүрген азаматтардың арасында байқау шілде айында онлайн түрде өткізілген болатын. Оған қатысқан Бейнеу жол дистанциясының техникалық бөлім басшысы Айдос Бөлекбаев, Маңғыстау жол дистанциясының инженер-технологы, кәсіподақ ұйымының төрағасы Марат Найжанов, жол жөндеуші Сабырхан Азаматовтың мерейі үстем болды.
Жеңімпаз жігіттерді құттықтап, жас болса да жол дистанциясында өзіндік орны, абырой беделі қалыптасып үлгерген маман Марат Найжановпен тілдескен едік. Жаңаөзен қаласында дүниеге келген Марат еңбек жолын Ақтаудағы М.Тынышбаев атындағы көлік колледжін «Ғимараттар құрылысы және пайдалануы» мамандығы бойынша бітіріп, жол жөндеуші болып бастаған. 2019 жылдан бері инженер-технолог ретінде жұмысқа кірісіп, өндірістік үдерістерді жетілдіру, еңбек қауіпсіздігін сақтау және технологиялық тәртіптің орындалуын қамтамасыз ету бағытында тер төгіп келеді. Былтыр «ChatGPT-мен жұмыс істеудің базалық дағдылары» оқу курсынан өтіп, цифрлық технологияларды жұмыс процесінде тиімді пайдалануды жетілдірген.
– Аталған білім беру бағдарламалары мен кәсіби даярлық курстары қызметтегі басқарушылық дағдыларды жетілдіруге, еңбек қауіпсіздігін қамтамасыз етуге, ұжыммен тиімді жұмыс жүргізуге және кәсіподақ қызметін сапалы ұйымдастыруға мүмкіндік берді. Мұны одан әрі де дамытып, үнемі ізденістемін, – дейді үздік теміржолшы Марат Найжанов.