Шымкент пен Арыстағы 4 ардагерге теміржол басшылығы сый-құрмет көрсетті
Шымкент қаласы бойынша меншікті тілшісі
Ұлы Жеңістің 77 жылдығына аман-есен жеткен Арыс пен Шымкент қаласында тұратын төрт теміржолшы ардагер бар. Олар: Қадыр Атажанов, Рахым Исмаилов, Қалмен Мұратов пен Исамахаммед Ахметов.
Мереке қарсаңында Шымкент ЖТ бөлімшесінің директоры Амангелді Арысбаев бастаған кәсіподақ және кадр бөлімінің өкілдерінен құралған топ қарт майдангерлердің шаңырағында болып, арнайы сый-сияпаттарын табыс етті. Амангелді Арысбаев ардагерлерді Жеңіс мерекесімен құттықтап, хал-жағдайларын сұрап, қажеттіліктеріне назар аударды.
«Ұлы Жеңіс күнінің халқымыз үшін орны бөлек. Кешегі күні фашизмді жеңген кеңес елі құрамындағы он бес республика қатарында қазақтардың үлес салмағы аз болған жоқ және батыр халық деген атымыз қалыптасты. Сол ерлеріміздің соңғы жұрнағындай көзі тірі санаулы ардагерлеріміз сіздердің біз үшін орындарыңыз бөлек. Елге оралған соң көп жыл теміржолда еңбек етіп, осы саланың дамуына атсалыстыңыздар. Өмір жолдарыңыз кейінгі теміржолшыларға үлгі болып қала береді», – деді А.Арысбаев.