Балмұздаққа тойған күн (Фото)

Балаларды қорғау күніне орай Жамбыл бөлімшесінде өткен мерекелік шара бүлдіршіндердің бөлімше жанындағы мұражайға серуенімен басталды. Музей меңгерушісі Венера Букенова Әулиеата өңіріне қатысты болат жолдың тарихы мен даңқты теміржолшылардың еңбек жолын балаларға ертегідей баяндап берді.

Бұдан соң балалар әкімшілік ғимараттың сыртында орналасқан тәжірибелік полигонда болды. Мұнда Өндіріс қауіпсіздігі және экология қызметінің бастығы Медет Каримбаев теміржолдың қауіпті аймақ екенін және өте жоғары кернеу күші бар бағаналардың маңында ойын алаңын ұйымдастыруға болмайтынын түрлі мысалдармен түсіндіріп берді және бүлдіршіндердің сұрақтарына жауап берді.

Әкімшілік ғимаратты аралап, Жамбыл бөлімшесі директорының орынбасары Мақсатбек Қазақбаевтың кабинетінде болып, вокзал алаңына орналасқан паровоз ескерткішінің алдында суретке түсті. Оларды көненің көзі, тарихи жәдігер болып қалған паровоздың әр деталі қызықтырды. «Мынау не?», «Анау не?»... деген балалардың түрлі сауалдарына Медет Каримбаев ерінбей-жалықпай жауап беріп жатты.  

– Мен музейде болғанда атамның суретін көріп мақтандым. Менің атамды бәрі таниды, ол өте білімді, күшті теміржолшы болған, – деп мақтанды Жамбыл жол бөлімшесін ұзақ жыл басқарған Сағымбек Ақшаловтың немересі Алина Ақшалова.  

Бұл күні бүлдіршіндер балмұздаққа тойды. Балаларға осындай тәтті мереке ұйымдастырып, демеушілік жасаған Жамбыл бөлімшесінің кәсіподақ ұйымы бүгін орталық саябақта үлкен іс-шара ұйымдастырмақ. Барлық бүлдіршінді сонда шақырды.