Семейлік теміржолшылар 65 тонна гуманитарлық жүк жөнелтті
Абай облысы бойынша меншікті тілші
Семейлік теміржолшылар «Amanat» партиясының облыстық филиалымен бірлесіп, еліміздің су тасқыны орын алған аймақтарына гуманитарлық жүк жөнелтті.
Ерікті жастардың жәрдемімен 65 тонна болатын азық-түлік, тұрмыстық бұйымдар тиелген арнайы пойыз Қостанай облысымен Арқалық қаласына жолға шықты.
Көмекке партияның аудандық филиалдары, шалғайдағы аудандық және ауылдық округтер әкімдіктері, жергілікті атқарушы орган өкілдері, депутаттар, кәсіпкерлер, Әйелдер қанаты, Жастар ресурстық орталығы, түрлі қоғамдық ұйымдар, әлеуметтік мекемелер атсалысты.
Бұл жүк небары үш күннің ішінде жиналыпты. Семей ЖТ бөлімшесі арнайы вагон бөліп, гуманитарлық көмекті діттеген жерге жеткізуді міндетіне алды.
Жалпы сомасы 20 млн теңгеден асатын алғашқы қажеттіліктегі тауарлар жүк қабылдап тапсырушылардың нұсқауымен тиеліп, оған колледж студенттерінен тұратын жүзден аса ерікті жас жұмылдырылды.
Сондай-ақ, аса қажетті құрылыс материалы ретінде жалпы көлемі 68 тонна болатын жергілікті зауытта өндірілген цемент те жөнелтілді.
– Бұл қиындық барша қазақстандықтарды біріктірді. Ұлттық компанияның бастамасымен теміржолшылар қауымы да алғы шептен табылып, қайырымдылық шараларына жұмыла кірісті. Ал, бүгінгі тиелген жүкті арнайы вагонмен диспетчерлік бақылау арқылы қысқа мерзім ішінде су тасқынынан зардап шеккен өңірлерге жылдам жеткізетін боламыз, – дейді қайырымдылық акциясын ұйымдастырушылардың бірі Семей ЖТ бөлімшесі бастығының орынбасары Ерғазы Жұмаділов.
Бір бұл емес, семейлік теміржолшылар су тасқыны орын алған Абай облысының аудандарына да көмек көрсетіп жатыр. Мәселен, осыған дейін Аягөз станциясында арнайы бөлінген платформа арқылы ауыр жүк көліктері қызыл су қаупі артқан Таңсық станциясына жөнелтілген еді. Мұның сыртында теміржолшы жастар да қайырымдылық заттарын қабылдайтын орталықтарға азық-түліктен бастап үрлемелі қайыққа дейін әкеліп өткізуде. Сөз соңында айта кетсек, Семей ЖТ бөлімшесі бойынша су тасқыны қаупі әлі толықтай сейілген жоқ. Төтенше жағдайлар басқармасының мәліметіне сүйенсек, ел шығысында, Алтай тауының сілемдерінде 55 пайыз қар жамылғысы жатыр. Желі бойын кесіп өтетін Бұқтырма, Жура, Үлбі сынды өзендердің көтерілу қаупі жоғары болып отыр. Яғни, шығыс жұртшылығы су тасқынының екінші толқынына даярлық жұмыстарын жүргізуде.