Ақтөбе рельс-арқалық зауыты су тасқынынан зардап шеккендерге көмек берді
Ақтөбе облысы бойынша меншікті тілші
Тасқыннан зардап шеккендерге еліміздегі ірі компаниялар қаржы аударып жатыр. Ақтөбе рельс-арқалық зауыты да бұл қатардан табылды. Олар тасқыннан зардап шеккендерге 22 млн теңге аударды.
Тасқыннан зардап шеккендерге гуманитарлық көмекпен қатар қаржылай да жәрдем беру жұмыстары жалғасып жатыр. Олардың қатарында қарапайым тұрғындардан бастап, ірі кәсіпорындар, ұлттық компаниялар мен мемлекеттік және жекелеген қайырымдылық қорлар бар. «Qamqor» қайырымдылық қорының хабарлауынша, қазіргі уақытта 774 млн теңгеден аса қаржы жиналған. Елдегі жағдайға бей-жай қарамай, халық басына түскен сын сағатта сырт айналмаған барша отандастар мен ірі кәсіп иелеріне қайырымдылық қоры алғысын білдірді. Олардың қатарында 22 500 000 теңге аударған Ақтөбе рельс-арқалық зауыты бар.
Айта кетейік, өңірде су тасқыны кезінде табиғи апаттан Ақтөбе қаласы және алты ауданда төтенше жағдай жарияланды. Ойыл, Ырғыз ауылдарында үш ауыл түгел суға кетті. Қазір бұл жерлерде жаңа ауыл құрылысы басталды.