«Саламатты Қазақстан» пойызы Жамбыл облысында
"Қазақстан теміржолшысы" газетінің Жамбыл облысындағы меншікті тілшісі
Барлық диагностика және процедуралық құрал-жабдықтармен жабдықталған «Саламатты Қазақстан» денсаулық пойызы Жамбыл облысын аралап жүр. Бүгінге дейін алты станцияға аялдап, тұрғындарға медициналық қызмет көрсетті.
Алдымен Сарысу ауданындағы Жаңатас вокзалына тоқтаған жылжымалы емхана мамандары таңертеңгі 9.00-ден бастап кешкі 18.00-ге дейін емделушілерді қабылдап, медициналық тексеруден өткізді, ал заңгерлер кеңес берді.
Әрі қарай Мойынқұм ауданына өтіп, Хантау станциясына аялдаған «Саламатты Қазақстан» пойызын жергілікті халық қуана қарсы алып, күні бұрын кезекке тұрып жатты.
– Денсаулық пойызында хирург, педиатр, психолог, невропатолог, ультрадыбыстық диагностика, жалпы тәжірибе дәрігері, рентгенолог, ЭКГ, ЛОР, офтальмолог, онколог-маммолог, гинеколог және уролог қызметтерімен қатар заңгерлік көмектер де көрсетіледі. Азаматтар медициналық тексерулерден өтіп, дәрігер кеңесін алудан бөлек, мемлекеттік әлеуметтік қолдауларды қалай алуға болады, зенетақы, жәрдемақы, әлеуметтік төлемдер тағаындау мәселелері боынша туындаған сұрақтары болса, заңгер кеңес береді, – дейді пойыздың бас дәрігері А.Егінбаева.
Келесі кезекте тағы бір апта Хантау, Қияқты, Бурылбайтал, Шығанақ, Мыңарал станцияларына тоқтап, шалғай елді мекендердің тұрғындарына қызмет көрсеткен денсаулық пойызы кеше әрі қарай жолға шықты. Жалпы, биылғы жылы еліміздің барлық өңірлерінде тұратын 90 мыңдай тұрғынды медициналық көмекпен қамту көзделген.
