Астанада кәсіподақтың VI есептік сайлау конференциясы өтті
«Қазақстан теміржолшысы» газетінің тілшісі
Астанада «Қазкөліккәсіп» ҚБ филиалы «ҚТЖ-Жүк тасымалы» ЖШС бойынша VI есептік сайлау конференциясы өтті. Осыған дейін филиалдың 14 бастапқы ұйымында өткен жиынның бұл қорытындысы деуге болады.
Кәсіподақтың соңғы 5 жылдағы жұмыс нәтижелері сөз болған жиында «ҚТЖ-Жүк тасымалы» ЖШС кәсіподағының төрағасы Ермек Төлегенов қазіргі таңда 47 мыңнан астам теміржолшы мүше болып отырған қоғамдық ұйымның жаңадан сайланған кәсіподақ басшыларын құттықтады. Конференция жұмысына «Қазкөліккәсіп» ҚБ төрағасы Оразғали Ахметбаев, «ҚТЖ-Жүк тасымалы» ЖШС директорының корпоративтік мәселелер жөніндегі орынбасарының міндетін атқарушы Марал Марасилов қатысып, сөз сөйледі.
Аталған филиалда 2020-2025 жылдар аралығында ауқымды жұмыс атқарылған. Атап айтқанда, пандемия кезінде ковидпен ауырып қалған теміржолшыларға көмек беруден бастап, түрлі табиғи және өндірістік бағытта апаттарға ұшыраған қызметкерлерге материалдық жәрдем беру, балаларды лагерьмен, жұмысшыларды санаториймен қамтамасыз ету, ресми мерекелерде сан алуан мәдени-спорттық іс-шаралар өткізу, еңбегі сіңген сала мамандарын марапатқа ұсыну және тағы да басқа жұмыстар туралы Е.Төлегеновтің баяндамасында айтылды.
– Кәсіподақтың қызметі оған мүше қызметкерлердің еңбек, әлеуметтік-экономикалық құқықтары мен мүдделерін қорғау, материалдық көмек көрсету және түрлі бұқаралық-мәдени іс-шаралар ұйымдастырудан тұрады. Әсіресе қазіргі таңда жұмыс берушілер тарапынан еңбек өнімділігін арттыру, штат пен қызметкерлер санын оңтайландыру мақсатында шешімдер қабылданып жатқан тұста кәсіподаққа жүктелер міндет екі есе артты. Еңбек ұжымдарындағы осындай өзгерістермен байланысты ахуал кәсіподақ тарапынан салмақты, саналы, тиімді шешімдер қабылдап, соған сай әрекет етуді талап етеді. Осы жолда аянбай еңбек етіп, кәсіподақ ісін дамытуға әрқайсымыз атсалысайық, – деді ол.
Жиын барысында өңірлердегі теміржолшылардың мәселелерін ортаға салу үшін Маңғыстау, Семей, Ақтөбе, Астана, Алматы теміржол бөлімшелерінің кәсіподақ басшыларына сөз берілді. Маңғыстау ЖТ бөлімшесі кәсіподағының төрағасы Әзірбай Тұрмағамбетовтің түбек теміржолшылары атынан жеткізген ұсыныстары хаттамаға тіркелді. 45 делегат қатысқан конференция жұмысы филиал төрағалығына Е.Төлегеновті қайта сайлады.