Оқушыларға рюкзак тарту етілді
"Қазақстан теміржолшысы" газетінің Жамбыл облысындағы меншікті тілшісі
Шу машиналандырылған жол дистанциясының кәсіподақ ұйымы теміржолшылар отбасындағы 10 оқушыға оқу құралдары салынған рюкзак тарту етті.
– Бірінші кезекте көп балалы отбасыларды назарға аламыз. Дистанция бойынша жасалған тізімдегі теміржолшылардың дені – ер азаматтар. Олар қазір жұмыс сапарымен нысан басында жүргендіктен, оқу құралдары толтырылған сөмкелердің көпшілігін балалардың аналарына тапсырдық. Жыл сайын жаңа оқу жылының басында осылай жұмысшыларымыздың отбасындағы оқушыларды қуантып тұрамыз, – дейді Шу машиналандырылған жол дистанциясы кәсіподақ ұйымының төрайымы Тоғжан Молдабаева.
Қыркүйек жақындаған сайын су жаңа оқу құралдарын ұстап көруге асығатын балалар жаңа сөмкесін бір ашып, бір жауып қуанып жүр. Жаңа нәрсеге деген қызығушылық – жаңалыққа құмартып тұратын бала көңілден туар ерекше сезім болса керек.