Зейінің ашылсын, балақай!
Ақтөбе облысы бойынша меншікті тілші
«Білім күні» қарсаңында «Әскерилендірілген теміржол күзеті» ЖШС Ақтөбе филиалының кәсіподақ комитеті бірінші сыныпқа қадам басқан 45 балаға қуаныш сыйлады.
Мекеменің кәсіподақ комитеті филиал қызметкерлерінің мектеп табалдырығын алғаш аттаған бүлдіршіндерге кеңсе тауарларымен толықтырылған сөмкелер табыстады.
«Бүгін Қазақстан Республикасы Конституциясының қабылданғанына 30 жыл. Бұл – мемлекеттің негізгі құжаты. Конституциялық қағидаларды берік ұстану – біздің міндетіміз. Осы күнді мектепке баратын бүлдіршіндерімізбен бірге атап өтуді ойладық. Мекемемізде жыл сайын жаңа оқу жылында әріптестеріміздің отбасындағы мектеп оқушыларына оқу құралдарымен бірге жаңа сөмке сыйлау дәстүрге айналған», – деді филиал директоры Сарыбай Сәрсенов.
Қызметкерлерді әлеуметтік қолдау – ұлттық компанияның басты басымдықтарының бірі. Қызметкерлердің әлеуметтік қорғалуын арттыру үшін арнайы бағдарлама аясында жұмыстар жолға қойылған. Кәсіподақ ұжымы бұл жолы да көпбалалы отбасыларды назардан тыс қалдырмады. Ұжымдық шартқа сәйкес филиал қызметкерлерінің 3 және одан жоғары мектеп жасындағы балаларына қаржылай қолдау көрсетілді.
Мұндай көмек 229 балаға бағытталды. Әр балаға 4 АЕК мөлшерінде 3,6 млн теңге материалдық көмек көрсетілді. Сонымен қатар Конституция күні мерекесіне орай филиалға қарасты атқыштар командалары мен топтарында оң нәтижемен көзге түскен үздіктерге Алғыс хаттар табыстады.