Теміржолшы әйелдер форумы өтті

Елордада «Қазтеміржолкәсіп» ҚБ-нің ұйымдастыруымен Әйелдерді дамытуға арналған корпоративтік форум өтті. Мақсат – теміржол саласында еңбек ететін әйел қызметкерлерге психологиялық көмек және эмоционалдық күйзелістің алдын алу. Екі күндік іс-шараға ел теміржолында түрлі қызметте еңбек ететін 40 шақты әйел қатысты.

Жиынды ашқан қоғамдық бірлестік төрағасы Оразғали Ахметбаев форум жұмысына сәттілік тілеп, түрлі деңгейдегі басшылық қызметтегі әйелдерден бастап инженерлер мен техниктер, электромонтерлер мен механиктер, диспетчерлер, қаржы-есеп мамандары мен сарапшылар т.т. қатысып отырған нәзікжандылардың бүгінгі басқосуы табысты да мазмұнды боларына сенім білдірді.  

Ұйымдастырушылардың айтуынша, бағдарлама тұжырымдамасының негізінде эмоционалдық әл-ауқатты нығайтудың заманауи тәсілдері және әйелдің ішкі тұрақтылығын қалыптастыратын бес құндылық жатыр. Атап айтқанда, олар - эмоционалдық тұрақтылық, ішкі ресурстар, энергия және тепе-теңдік, болашақ технологиялары.  

Бағдарламаның бірінші күні эмоционалдық тұрақтылық және ішкі ресурстар тақырыбына арналды. Тренерлер қатысушыларға алдымен қазіргі әйел өміріндегі сын-қатерлер және олардың эмоционалдық жағдайға әсері, эмоционалдық интеллект, саналылық және эмоционалдық икемділік, психологиялық күйі, ішкі тұрақтылықтың негізі туралы түсіндірді. Практикалық сессияда жеке энергия көздері мен эмоционалдық триггерлерді анықтау, эмоционалдық өзін-өзі реттеу, ішкі ресурстарды қалпына келтіру, эмоционалдық тепе-теңдікті сақтау бойынша жұмыстар жүргізілді. Одан әрі ұйымдастырушыларға өмірлік энергияны басқару, жеке ресурстар мен қалпына келу факторларын анықтау туралы ақпараттар берілді.  

Форумның екінші күнгі тақырыбы «Шабыт. Болашақ технологиялары және шығармашылық арқылы қалпына келу» деп аталды. Бұл күні қатысушылар ALEM.AI халықаралық ЖИ орталығына барып, заманауи технологиялармен, әлемдік цифрлық трендтермен танысты. ЖИ-ді кәсіби қызметте, білім алуда және күнделікті өмірде пайдалану мүмкіндіктері жайында мәліметтерге қанықты. Одан әрі шығармашылық шеберлік сабақтары өткізілді. Соңында екі күннің негізгі нәтижелері ой елегінен өткізіліп, қатысқан әйелдер алған әсерімен бөлісті.  

– Теміржолда 23 жылдан бері жұмыс істеймін. Әйелдер үшін мұндай іс-шаралардың ерекше маңызы бар екенін атап өткім келеді. Бүгінгі таңда жұмыс істейтін әйелдер көптеген міндеттерді бір өзі атқарады, яғни отбасын да, жұмысын да қатар алып жүреді. Сондықтан уақытында тоқтап, күш-қуатыңызды қалпына келтіріп, эмоционалды тепе-теңдікті сақтауды үйрену өте маңызды. Бұл форум бізге осы бағытта жаңа білім алуға ғана емес, өзімізді, ішкі ресурстарымызды жақсы түсінуге, стрессті жеңуге және бірбірімізді қолдауға мүмкіндік берді. Тренермен жұмыс істеу, практикалық тапсырмалар мен қатысушылар арасындағы қарым-қатынас арқасында форумның атмосферасы өте жылы болды. Біз бұрыннан білетін таныс нәрселерге жаңа көзқараспен қарап, тың дүниені үйрендік, – дейді «ҚТЖ – Жүк тасымалы» ЖШС Павлодар филиалы кәсіподақ комитетінің және Әйелдер істері жөніндегі кәсіподақ комиссиясының төрайымы Айгүл Махметова.  

Корпоративтік форумға қатысқан барлық әйелдерге сертификат берілді және бағалы сыйлықтарға ие болды. Екі күндік іс-шара нәзікжандылар көңілінен шығып, білім көкжиегін кеңітумен қатар көтеріңкі көңіл күй сыйлады.