«Өндірісте өзімді электромеханик сезінемін...»

Әлеумет

26.08.2016, 17:02

«Қос рельстің бойымен жүйткіген локомотивтер автокөліктер секілді бағдаршамдар қызметіне бағынады», – дейді кейіпкеріміз Ақжайық белгі беру және байланыс дистанциясының директоры Мақсот Тарғынов. Рас қой. Темір жолдың міндеті – жолаушы мен жүк тасымалдау процесін жүзеге асыру десек, осы жұмыстарды атқаруда белгі беру және байланыс дистанциясының қызметі айрықша. Өйткені, дала мен қалада айқұш-ұйқыш тартылған темір жолмен бір сызықтың бойымен жүргендей рет-ретімен қозғалып жатқан пойыздардың жүрісін басқарып отырған сол бағдаршамдар, белгі беру, байланыс жүйесі. Құрметті теміржолшы Мақсот Жұмағалиұлы осы қиын да күрделі салада қырық жылдан астам еңбек етіп келеді. Сағыз станциясында қарапайым теміржолшы отбасында дүниеге келген оның балалық шағы әкесінің жұмыс бабымен қоныс аударған Мұқыр станциясында өтіпті. 1974 жылдың ақпан айында Батыс Қазақстан темір жолының Гурьев бөлімшесінің №31 сигнализация және байланыс дистанциясына электромонтер болып жұмысқа орналасқан күннен бастап осы саланың ыстығына күйіп, суығына тоңған жылдар жылжып өте берді... 1977 жылы Алматы темір жол техникалық мектебін тәмамдап, электромеханик мамандығын алады. 1978-1981 жылдары Ақтөбе темір жол техникумына оқуға түсіп, оны да ойдағыдай бітіріп, Мұқыр станциясы мен Кенбай бекеті учаскесінде аға электромеханик, Мақат – Сағыз учаскесінде учаске бастығы қызметін атқарып, тәжірибелі маманнның біріне айналады. Еңбек ете жүріп Алматы темір жол иститутын сырттай оқып, саласы бойынша жоғары білім алады. Үнемі оқу мен ізденіс үстінде жүретін маманды басшылық 2001 жылы Атыраудың Ақжайық сигнализациялау және байланыс дистанциясы бастығының орынбасары етіп тағайындайды. Өзіне жүктелген міндетті ойдағыдай атқарып, өндіріске талай жаңашылыдықтар енгізумен көзге түскен маман 2007 жылы дистанция директоры болып тағайындалады. Содан бері міне, он жылға жуық уақыт өтті, осы ұжымның тасы өрге домалауы үшін аянбай тер төгіп келеді. Белгі беру және байланыс қызметіндегі қиын да күрделі кезеңдерден ұжымын аман-есен алып өтіп, не мәселенің де оңтайлы әрі бағалы шешімін таба білетін іскер басшы аймақта белгі беру-байланыс саласын жаңартып, Қарабатан, Мақат дөңес алды, Ақжайық, 441, Теңдік бекеттерін, орталықтан диспетчерлік басқару жүйесі (МПЦ «Диалог»), КТҚК қондырғыларын өндіріске қосуға атсалысқанын мақтан тұтады. «Өндірісте мен өзімді әлі күнге электромеханик сезінемін» дейді кейіпкеріміз. Зулаған уақыт қандай ұшқыр, тамыздың 27 жұлдызында ел ағасы жасы 60-қа толып отырған Мақсот Жұмағалиұлы өзі сүйген кәсіпте, еңбекпен өрілген өміріне өкініші жоқ. Шүкіршілік, жұбайы Райса Исмағұловамен бірге екі ұл, үш қыз тәрбиелеп өсіріп, олардан сүйген немере-жиен шаңырағының шаттығын тасытып отырған өнегелі отбасы бар. Екінші ұлы Ержан Тарғынов 2005 жылдан бері әке жолын қуып, Атырау белгі беру және байланыс дистанциясында бас инженер болып қызмет атқарады. Осындай лайықты абыройға ие азамат, нағыз білікті инженер, іскер басшыны оның туған шаңырағындай болып кеткен ұжымы да мерейлі жасымен құттықтауға асық.

«Өндірісте өзімді электромеханик сезінемін...»

Басқа да жаңалықтар