Салаландыру саясатына ден қойған

Маңғыстау облысының техникалық және кәсіптік білім беру ұйымдарын профилдендіру, яғни  салаландыруға  байланысты Маңғыстау политехникалық колледжінде "Теміржол көлігімен тасымалдауды ұйымдастыру және қозғалысты басқару"  мамандығы бойынша биылғы жаңа  оқу жылында оқу орнына студент қабылдау жүргізілмеген. Дегенмен аталған мамандық бойынша 2,3,4  курстарда білім алушы студенттер оқу мерзімі аяқталғанша білімін Маңғыстау политехникалық колледжінде жалғастыратын болады. Ескеретін жайт, 2016-2017 оқу жылында темір жол мамандықтары бойынша мемлекеттік білім беру тапсырысы негізінде жергілікті бюджет есебінен 125 орын, арнайы мамандандырылған және студенттердің тәжірибеден өтуі  үшін оқу өндірістік базасы бар М.Тынышбаев атындағы Қазақ көлік және коммуникациялар академиясының Ақтау көлік колледжіне бөлінді. Аймақтағы техникалық және кәсіптік білім беру бөлімінің басшысы Альмара Сүлименованың айтуынша, облыста 26 техникалық және кәсіптік білім беру мекемелері жұмыс істейді.  Қазіргі таңда жұмыспен қамту нарығына шолу, жергілікті жердегі мамандарының жұмысқа орналасу деңгейіне талдау жасау арқылы оларды салаландыру, сұранысқа ие қажетті мамандықтарды көбейту, керісінше сұранысқа ие емес мамандықтарда оқытуды азайту, оңтайландыру бойынша біріктіру жұмыстары қарастырылуда екен. ─ Биылдан бастап біраз мамандықтар қысқартылып, салаландыру  жұмыстары өткізілді. Себебі, әр колледж өз бағытымен сабақ беруі тиіс. Және үш бағыттан аспауы керек. Мысалы, энергетикалық колледждің бағыты энергетика. Ал, ол жерде қаржыгерлер мен есепші мамандарды, тіпті бағалаушыларды да дайындайтынбыз. Бейімдеу жұмыстарын осындай себептерге байланысты жүргіздік. Тағы бір себебі, біздің бүкіл колледждеріміз көп салалы болып кетті. Мұндай жағдайда әрине, білім беру мекемелерінің сапасы төмендейді.  Бірақ, бейімдеу шараларын жүргізгеннен кейін бізде мемлекеттік тапсырыс төмендеп қалды. Бітірушілерді жұмыспен қамту жағы да қиындау болып тұр. Қазіргі нарықта мұқтаждық болмаса мемлекеттік тапсырысқа отырғыза алмаймыз. Үстіміздегі жылдың мамыр айында мәслихатта «Техникалық  қызмет көрсету саласына кадрлардың жоғары даярлығы мен бәсекеге  қабілеттілігін қамтамасыз ету үшін қолайлы жағдайлар жасау» туралы тақырыпта қоғамдық тыңдау өткізілген болатын. Сонда айтылған ұсыныстар  бойынша колледждерге  қатысты бірталай оңтайландыру шаралар қабылданды, – дейді Альмара Қасымханқызы. Айта кетерлігі, салаландыру жұмыстарының нәтижесінде, Қарақия кәсіптік колледжінде  «Кеме жасау және кеме машиналары мен механизмдеріне техникалық қызмет көрсету» деп аталатын  жаңа мамандық «Кеме жөндеуші слесарь», «Кеме құбыр июшісі» біліктіліктерімен ашылған. Керісінше, жауыннан соңғы саңырауқұлақтай көбейіп кеткен қаржы және құқықтану мамандықтары мемлекеттік тапсырыстан алып тасталыныпты.

 Әсел ТАҢАТАРОВА, Маңғыстау