ҚТЖ құрама командасы шағын футболдан Қазақстан чемпионы атанды

«ҚТЖ» ҰК» АҚ құрама командасы мемлекеттік қызметшілер мен квазимемлекеттік сектор компанияларының қызметкерлері арасында өткен QAZAQSTAN QYZMET CUP атты шағын футболдан Қазақстан чемпионатының жеңімпазы атанды, деп хабарлайды Rail-news.kz.

Шағын футболдан өткен чемпионатқа түрлі министрлік пен ведомствалар,  ұлттық компаниялар мен олардың еншілес құрылымдары атынан 16-дан астам команда қатысты. Сайыс Щучинск маңындағы «Жақсы-2» спорт кешенінде өтті. D тобына түскен «ҚТЖ» ҰК» АҚ құрама командасы Нұр-Сұлтан қаласы мен Қызылорда облысы полиция департаменті командасы және Павлодардан келген «ERG Service» АҚ филиалының командасымен бақ сынасты.

– Әр команда өз қаласы мен облысында үздік шыққан. Дегенмен, біздің топқа ең мықтылар түсті, сондықтан да оны «өлім тобы» деп текке айтқан жоқ. Жартылай финалға өту жолдамасын ешкім оңайлықпен бергісі келмеді. Жеңіске деген ыждаһаттықтың арқасында Нұр-Сұлтан қаласы мен Қызылорда полиция департаменттерінің командасын жеңе білдік. Ең ауыр ойын павлодарлық «ERG Service» АҚ филиалының командасымен арада болды. Матч 0:0 есебімен аяқталды. Бірақ осы нәтиженің өзі бізді топта бірінші орын алуымызға мүмкіндік берді, – дейді ҚТЖ командасының мүшесі, «Әскерилендірілген темір жол күзеті» ЖШС-нің әскерилендірілген күзет қызметін ұйымдастыру бөлімінің қару-жарақ, кәсіптік және дене шынықтыру дайындығы жөніндегі тобының бас менеджері Қанат Бейсембаев.

Финалда «ҚТЖ» ҰК» АҚ құрама командасы «Қазақтелеком» АҚ өкілдерімен сынға түсті. Ойын керемет тартысты өтті, командалар тек жеңіске ұмтылумен болды. Ешкім берілгісі келмеді, қарсыластар соңғы секундқа дейін аянбай күресті. Дегенмен, теміржолшылар екінші таймның соңғы минуттарында гол салып үлгерді. Келесі таймда ойын аздап бәсеңдегенімен, ҚТЖ футболшылары есепті ұстап қала білді.

Турнир қорытындысы бойынша жекелей ойыншылар марапатталды. ҚТЖ командасының өкілі, «Қазақстан вагон құрылыс компаниясы» ЖШС-нің жұмысшысы  Юрий Дмитриев үздік қақбашы деп танылды, ал үздік шабуылдаушы атағына «ҚТЖ» ҰК» АҚ филиалы «Автоматтандыру және цифрландыру депаратментінің» бас маманы Мейрамбек Ниязбеков ие болды.    

Жеңімпаздардың барлығы құттықтау қағаздары және медальмен  марапатталды.