Жастар форумында жұмыс тиімділігін арттыратын 11 жоба ұсынылды
«Қазақстан теміржолшысы» газетінің тілшісі
Жастар форумы аясында өндірісте жұмыс тиімділігін арттыратын 11 жоба ұсынылды. Соның біріншісін компания басшылығына Өскемен магистральдық желілер бөлімшесінің басқару жүйесін автоматтандыру секторының бастығы Евгений Португальский таныстырды. Бұл жоба «QR көмегімен оргтехника есебін тиімді жүргізу» деп аталады. Жобаны жүзеге асыру арқылы инвентаризацияға кететін уақытты 3 есе қысқартуға болады. Екінші жоба – «Ана тілінде тиімді коммуникация дамыту» деп аталып, оны Атбасар белгі беру және байланыс дистанциясының байланыс диспетчері Әсем Құласбаева таныстырды.
– Еліміздің барлық өңірлерінде теміржолшылар бір-бірімен ана тілінде анық ақпараттар алмасу үшін қазақ тілін дамытуды көздедік. Сол үшін өз дистанциямызда сауалнама жүргіздік. 183 адаммен сөйлесе келе олардың 10 пайызы қазақша мүлдем білмейтінін, 60 пайызы білмесе де үйренуге ниетті екенін, 30 пайызы мемлекеттік тілді білетінін анықтадық. Соларды үйрету үшін бұл жоба бойынша ешқандай шығын шықпайды. Оны біз компаниядағы осы жастар арасындағы қазақша жақсы меңгерген белсенді қызметкерлермен ZOOM арқылы жиын өткізу керек деп санаймыз, – дейді Ә. Құласбаева.
«Локомотив бригадаларының моральдық жүктемелерін, ауыртпалығын анықтау әдісі» деген үшінші жобаны Түркістан локомотив пайдалану депосының шұғыл техникалық есепке алу орталығының бастығы Ерлан Бегімов айтып берді.
– Локомотив шаруашылығында қозғалыс қауіпсіздігі өте маңызды. Сондықтан бригаданың сапар алдында толықтай тынығып шығуы керек. Ол үшін арнайы жабдықталған онлайн платформа орнатуды ұсынамыз. Құрастырылған платформаны тестпен бірге сапар алдындағы депо кезекшісі аймағындағы арнайы компьютерге орналастыру қажет, – дейді жоба авторы.
Осылайша басқа өңірлер де өз жобаларын қорғады. Атап айтқанда, олардың қатарында «Электронды құжат айналымына QR код қолдану», «Клиенттің саяхаттау картасы», «Су шығынын оңтайландыру», «Деректердің интерактивті талдауы», «Персоналды ресурс үнемдеу процесіне тарту» және басқа да жобалар болды. Жобалар бойынша барлық авторлар Құрмет грамоталарымен марапатталды.