Теміржолшы құрметіне зертхана ашылды
«Қазақстан теміржолшысы» газетінің тілшісі
Мұхамеджан Тынышпаев атындағы ALT Университетінде Қазақстанның Еңбек Ері, Құрметті теміржолшы Қалтай Сәмбетов атындағы орталықтандырылған микропроцессорлық жүйелердің мамандандырылған зертханасы ашылды.
Жаңа оқу аудиториясына Қалтай Сәмбетовтың есімі ALT University алаңында өтетін көліктегі қауіпсіздік және цифрландыру жөніндегі VII Еуразиялық форум аясында берілді. Зертхананың ашылуы қазіргі заманғы теміржол саласы үшін тәжірибеге бағдарланған білім беруді дамыту және мамандар даярлау жөніндегі көп жылдық жұмыстың жалғасы болды.
Қалтай Сәмбетовтің еңбек жолына 68 жыл толды. Ол өзінің кәсіби өмірбаянын аты аңызға айналған Түрксібте Аягөз дистанциясының автоматика, телемеханика және байланыс электр монтаждаушысы болып бастаған. Ұзақ жылдар түрлі басшылық лауазымдарды атқарды, ұлттық компанияның бірінші вице-президенті болды. Бүгінде 87 жастағы Қалтай Сәмбетов «ҚТЖ» Консультативтік кеңесінің мүшесі ретінде теміржол көлігінде белсенді жұмыс істеуді жалғастыруда.
Болашақ теміржолшылар заманауи инфрақұрылымның дамуын айқындайтын технологияларды игеретін зертхананы «Qaz Rail automatic» компаниясы жарақтандырды. Мұнда отандық өндірістің микропроцессорлық орталықтандыру жүйесі орнатылған. МПО-QZ бірегейлендірілген цифрлық жүйелік шешімдер мен өз өндірісінің жабдықтары негізінде құрылған және теміржол инфрақұрылымын жаңғыртуға арналған.
Зертханада студенттер үшін 24 және басшы үшін бір жұмыс орны жабдықталған. Оқу сыныбы орталық есептеу кешені жабдықтарының толық жиынтығымен, телекоммуникациялық жабдықтармен жабдықталған.
– Таза микропроцессорлық бөлік іске асырылды. Болашақта оқу сыныбын заманауи нормативтік-техникалық құжаттармен сүйемелдеуді жоспарлап отырмыз. Студенттердің таңдаған мамандығы бойынша теориялық дайындығы болуы және алған білімдерін тәжірибеде қолдануға дайын болуы үшін, – деп атап өтті «Qaz Rail automatic» ЖШС директоры Жәнібек Аяғанов.
Компания мен ALT University арасындағы келісім одан әрі ынтымақтастықты көздейді. Мамандар практикалық сабақтар өткізеді, ал жыл сайын екі-үш студент компанияда өндірістік практикадан өте алады.
Сәмбетов атындағы мамандандырылған зертханада бейіндеуші пәндерді оқып жүрген 3-4 курс студенттері айналысады. Негізгі міндет – болашақ мамандардың кәсіптік қызметінде тікелей талап етілетін құзыреттерді қалыптастыру.
Студенттер пойыздар қозғалысының қауіпсіздігін қамтамасыз етудің заманауи кешендерін пайдалануға байланысты басқаруды автоматтандыру және сандық жүйелердің киберқауіпсіздігі бағдарламаларын меңгеретін болады. Темiржол бiлiмi үшiн бұл ерекше маңызды: автоматиканың салалық жүйелерi технологиялық эволюцияның кезектi кезеңiнен өтуде дәстүрлi шешiмдер бiртiндеп цифрлық технологияларға орын беруде.
– Біздің университет үшін зертхана өте маңызды. Барлық теміржол автоматикасы дәстүрлі жүйелерден сандық жүйелерге дейін үлкен эволюция жолынан өтеді. Осындай зертханада жұмыс істеудің арқасында біздің түлектер пайдалану талаптарына барынша бейімделетін болады. Диплом алғаннан кейін олар кәсіби қызметке тезірек кірісе алады. Мұнда білім мен кәсіби дағдыларды алатын әрбір студент өзінің қолында тек заманауи жабдықтар ғана емес, болашақ мамандықтың күрделі әрі жауапты әлемі бар екенін түсінеді, – деп атап өтті ALT University қауымдастығының профессоры Гүлфариза Сүлейменова.
Жаңа зертхана қазіргі заманғы оқу алаңы ғана емес, бүгінде Қазақстанның теміржол инфрақұрылымын дамыту үшін пайдаланылатын білім беру, өндірістік практика мен технологиялар біріктірілетін кеңістікке айналуда.
Ал зертханаға есімі берілген Еңбек Ері Қалтай Сәмбетов университет студенттеріне оқуда және кәсіби өмірде табыс тіледі.
– Ертең сіздер темір жолға жұмыс істеуге келесіздер, сала болашағы сіздердің қолдарыңызда. Табысты кәсіби теміржолшы боласыздар деп сенемін, – деді Құрметті теміржолшы.