Болгарияда Alstom компаниясының Coradia Stream электропойыздары жолаушы тасымалын бастады
1 қыркүйектен бастап Болгарияда алғашқы екі Coradia Stream электропойызы жолаушылар тасымалына шықты. Қазір пойыздар төрт қалааралық бағытта қатынайды. Алдағы уақытта жаңа құрамдар пайдалануға берілген сайын маршруттар желісі де кеңейтіледі, деп хабарлайды Rail-news.kz.
Алты вагоннан тұратын, төмен еденді Coradia Stream электропойыздары сағатына 160 шақырымға дейін жылдамдықпен жүре алады. Олар пойыздардың қозғалысын басқарудың еуропалық ETCS жүйесімен жабдықталған.
Бір құрамда бірінші және екінші класта барлығы 325 жолаушыға арналған орын бар. Сондай-ақ қозғалысы шектеулі жолаушыларға, мүгедектер арбасына және велосипедтерге арналған арнайы орындар қарастырылған. Багаж орналастыруға да мүмкіндік бар.
Бұл жылжымалы құрам Болгарияның Көлік және байланыс министрлігінің тапсырысы бойынша жеткізілуде. Жоба елдегі жолаушылар пойыздары паркін соңғы 20 жылдағы алғашқы кешенді жаңарту бағдарламасы аясында жүзеге асырылып жатыр.
2025 жылдың сәуірінде министрлік француздық Alstom компаниясы мен жергілікті RVP Invest консорциумымен құны 452 млн еуроны құрайтын келісімге отырып, 35 электропойызға тапсырыс берген. Бұған қоса, пойыздарға 15 жыл бойы техникалық қызмет көрсетуге тағы 268 млн еуро жұмсалады. Қызмет көрсету жұмыстары София маңында жаңадан салынатын депода жүргізіледі.
Айта кетерлігі, сол кездегі тендерде пойыздарды жеткізу мерзімі өте қысқа болған. Alstom компаниясы құрамдарды 2,3 жыл ішінде жеткізуге кепілдік беріп, тендерде жеңіске жетті. Мұндай қысқа мерзімде тапсырысты орындауға компанияға Румыния үшін шығарылып жатқан осындай пойыздардың өндірісі көмектесіп отыр. Бұл пойыздарды шығару Польшадағы Катовице қаласында бұрыннан жолға қойылған.
Бұған дейін, тамыз айында, Болгарияда чехиялық Skoda Group компаниясы шығарған 20 өңірлік электропойыз да жолаушылар тасымалына шыққан болатын. Бұл құрамдарға 2024 жылы дәл осы жаңғырту бағдарламасы аясында тапсырыс берілген. Жыл соңына дейін тағы бес электропойызды пайдалануға беру жоспарланып отыр.