Жаңа жобаны жүзеге асыраудан ұтарымыз көп
«Қазақстан темір жолы» компаниясының алдына қойған басты стратегиялық мақсаттарының бірі – компания жұмысының тиімділігін арттырып, оны 2023 жылға қарай қаржылық дағдарыс аймағынан алып шығу. Осы бағыттағы басымдық – пойыздар қозғалысы қауіпсіздігін және халықаралық бағдарлардың бәсекеге қабілеттілігін қамтамасыз етуге жағдай жасап, қолданыстағы инфрақұрылымды жаңғырту болып отыр.
Аталған Стратегияны жүзеге асырудың басты құралы – «Цифрлық трансформация» бағдарламасы. Соның шеңберінде «Пойыздар қозғалысын басқару орталығы» жобасын жүзеге асыру барысы туралы осы сәрсенбіде компанияда ақпараттық күн ұйымдастырылды.
Жиынға төрағалық еткен «ҚТЖ» ҰК» АҚ басқарма төрағасының орынбасары Қанат Әлмағамбетов жобаның мақсаттары мен тиімділіктерін түсіндіріп берді.
– Бұл жоба мақсаты – пойыздар қозғалысын автоматты түрде басқару, есепті автоматтандыру, өндірістік қызметті жоспарлау, талдау және бақылау үшін моральдық тұрғыда ескірген және тозған ДЦ жүйесін жеке өңдеу бойынша заманауи микропроцессорлық құрылғыларына ауыстыру. Мұның тиімділігі неде? Тиімділігі – пойыздар туралы ақпараттық мәліметтер есебімен автоматты тәртіпте телімдерде пойызға қатысты болатын жағдайларды үздіксіз бақылау, телімдік жылдамдықты арттыру, КТСМ құрылғылары көрсеткен, станция аралықтарында пойыздардың аялдауынан болатын өнімсіз шығындарды азайту, технологиялық процесс графигінің орындалуын бақылау, ұлттық компания телекоммуникациясының цифрлық желілерін құру болып отыр, – деді ол.
Барлық телімдерде микропроцессорлық диспетчерлік орталықтандыруды енгізіп болғаннан кейін қазірден бастап-ақ пойыздарды басқару орталығын екі бағыт бойынша құру мәселесі қарастырылуда. Бірінші нұсқа – Ақтөбе, Көкшетау, Қарағанды, Семей және Алматы қалаларында пойыздар қозғалысын басқарудың бес өңірлік орталығын және НұрСұлтан қаласында бір басты орталық ашу. Екіншісі – Нұр-Сұлтан қаласында пойыздар қозғалысын басқарудың бір орталығын құру.
Жоба жүзеге асқаннан кейін бірқатар станциялар мен станция аралықтарын бағыттама бұрмалары мен бағдаршамдардың бір қосынынан басқару, пойызбен қатысты жағдайлардың автоматты тәртібін үздіксіз бақылау мүмкіндігі туады. Тасымалдау процесін жүйелі ситуациялық талдауды, пойыздардың тұрып қалуын болжалдау мен талдауды қамтамасыз етеді. Пойыздарды өткізуде және құрамдарды бекітуде қауіпсіздікті қамтамасыз ету бойынша түрлі басқару деңгейіндегі жұмысшы-қызметкерлердің әрекеті бақылауға алынады. Қысқасы, Қанат Әлмағамбетовтің айтуынша жаңа жобаны жүзеге асырудан ұтарымыз көп.
Жобаны жүзеге асыру мерзімі – 2018-2025 жылдар аралығы. Оны іске қосқаннан кейін пойыздар жағдайы туралы ақпаратты бірыңғай орталыққа беру мүмкіндігі туады. Былтырдан бері жоба іске қосылғалы бірқатар жұмыстар атқарылыпты. Атап айтқанда, Ақтөбе, Атырау магистральдық желі бөлімшелеріндегі 4 телімге микропроцессорлық диспетчерлік орталықтандыру енгізілді. Жоспарланған 127 желілік-аппарат залының үшеуінде жабдықтар цифрлық арнатүзгіш құралдарға ауыстырылды. 36 белгі беру және байланыс дистанциясының 11-де пойыз жүріп келе жатқанда жылжымалы құрам бойынша автоматтандырылған бақылау жүйесі енгізілді. 36 ШЧ-да СЦБ және байланыс құрылғылары бойынша түбегейлі және дәнекерлеуді енгізудің автоматтандырылған жүйесі іске қосылды.
«Пойыздар қозғалысын басқару орталығы» жобасын жүзеге асыруды бастауға бірнеше факторлар алғышарт болды. Мәселен, кейбір телімдерде диспетчерлік орталықтандыру жүйесінің жоқтығы, диспетчерлік орталықтандыруда релелік жүйенің болуы, көлік дәліздеріне кіретін телімдердің өткізгіштік қабілетін қамтамасыз етудің мүмкін еместігі, кейбір телімдерде жылжымалы құрам жағдайын басқару құрылғыларының болмауы, ақпарат тарату арналарында «ҚТЖ» ҰК» АҚ желісі қажеттіліктерін қамтамасыз етудің мүмкін еместігі.
Жиында жобаның ағымдағы жағдайы мен жақын уақытқа арналған жоспарлар туралы «Магистральдық желі дирекциясы» филиалының телемеханика және телекоммуникация, автоматика департаментінің директоры А.Әбдірахманов мәлімет берді.