Көмір тиеу станцияларының инфрақұрылымын дамыту - тасымал тұрақтылығының кепілі
«Қазақстан теміржолшысы» газетінің тілшісі
«ҚТЖ» ҰК» АҚ басшылығы ірі көмір разрездері өкілдерімен кезекті көшпелі кеңес өткізді. Кездесуде Шұбаркөл және Қызылжар жүк тиеу станцияларын инфрақұрылымдық дамыту, сондай-ақ көмір тиеуге қажетті жылжымалы құраммен қамтамасыз ету және ашық вагондарды ұтымды пайдалану мәселелері талқыланды. «ҚТЖ» ҰК» АҚ магистральдық желісінде көмір разрездерінің қажеттілігін толық көлемде қамтамасыз ету үшін жылжымалы құрам жеткілікті. Қатты отынды тасымалдауға 35 мың түрлі меншік нысанындағы ашық вагон тартылып отыр. «ҚТЖ» ҰК» АҚ еншілес ұйымы – «Қазтеміртранс» АҚ көмір тасымалына 13 мыңнан астам вагон ұсынып отыр. Бұл қолданыстағы парктің 66% құрайды. Кеңес барысында жүк жөнелтушілерге ашық вагондардың жүк операциялары барысында тұрып қалуы уақытын және олардың айналымын азайту ұсынылды. Айта кетейік, ағымдағы жылдың 9 айында қазақстандық тұтынушыларға 53 млн тоннадан астам көмір тасымалданды. Бұл көрсеткіш өткен жылдың сәйкес кезеңімен салыстырғанда 2% жоғары. Кеңес қорытындысы бойынша жауапты құрылымдық бөлімшелерге көмір өндіруші кәсіпорындарға кірме темір жолдар құрылысы перспективаларын қарау бойынша тапсырмалар берілді.