Семей ЖТ бөлімшесі биыл 12 млн тоннадан астам жүк тасымалдауды жоспарлап отыр

Семей ЖТ бөлімшесінде жүк айналымын арттыру бойынша қолға алынған шаралар оң нәтиже беруде. Бұл орайда соңғы тоғыз айдың қорытындысында оң көрсеткіштер көп. Осыған қарап, межелі шаралар толық орындалып жатқанына көз жеткізуге болады. Жүк түсіру мен тиеу бойынша соңғы мәліметтерге сүйенсек, өткен жылдың есепті мерзімімен салыстырғанда атқарылған жұмыс көлемі 102 пайыз болыпты. Бұл техникалық жоспардың да көзделген мөлшерден асыра орындалғанын айғақтайды. Әсіресе, түсті металл өнімдері тиелетін Жаңғызтөбе, әктас пен қиыршық тас, шағыл артылатын Суықбұлақ, ішкі әрлеуге арналған құрылыс материалдары тиелетін Аягөз станцияла- рындағы жүк тиеу көрсеткіштері бұрынғыға қарағанда анағұрлым жоғарылап отыр. Сонымен қатар, 1-класты Жаңа-Семей жүк станциясынан темірбетонды өнімдер мен «Силикат» ЖШС-ның кірпіш өнімдері мен цемент тиеу де артқан. Бұл аталған станциялардағы негізгі басымдық берілетін жүктерге жатады. Ал, Семей станциясында астық пен мультимәдени дақылдар тиеудің көлемі биыл да жоғарылап отыр. Семей ЖТ бөлімшесінің логистика және жүк тасымалын ұйымдастыру бөлімі мамандарының айтуынша, цемент жөнелтуде техникалық жоспар бойынша межеленген жоспар асыра орындалған. Тек осы құрылыс материалын тиеудің өзі 109,1 пайызға жетіп отыр. Оған ел шығысында мемлекеттік бағдарламалар аясында салынып жатқан тұрғын үйлер құрылысының жылдағы мөлшерден артуы да біршама себеп болуда. Яғни, құрылыс материалдарының тасымалы Қаражыраның көмірінен кейін екінші орында тұр. Жалпы, биылғы жылы жергілікті теміржолшылар толық көлемі 12,0 млн тоннаның үстінде жүк тасымалдауды жоспарға алып отыр. Оның ішінде, әлбетте, тұрғынүй және жол құрылысына арналған материалдардың үлесі мен көмір тасымалының көлемі және астық өнімдері жылдағыдай мол болып отыр. Сонымен қатар, биылғы күзде «Шығыс- Астық» ЖШС мен жаңадан ашылған күнбағыс майын шығаратын «Qazaq-astyq group» ЖШС ұлттық компаниясымен арадағы келісімшарт негізінде тапсырыс көлемін еселеп отыр. Өндірілген тауар көлемі негізінен Ресей мен Орта Азия елдеріне экспортталады. Биылғы жылы шығыста зығыр, рапс және күнбағыс дақылдарының алқабы ұлғайыпты. Сондықтан да, Ауыл, Белағаш станцияларында осы жүк түрлерін тиеу биыл қайтадан қолға алынуда. Осы орайда Семей ЖТ бөлімшесі бойынша өндіріске жұмсалатын шығын мен кіріс көлемі бойынша көрсеткіштер қазіргі күні нәтижелі түрде орындалуда. Биыл жүк айналымын 7418 млн ткм неттоға жеткізіп, учаскелік жылдамдықты 39,44 км/сағ.-қа жоғарылату семейлік теміржол- шылар үшін басты меже саналып отыр. Ал, қазіргі күнгі қол жеткізілген нәтижелерге қарап жыл соңына дейінгі екі айдың ішінде көзделген жоспар толығымен орындалады деген сенім бар.