Семей ЖТ бөлімшесінің бір тәулікте 154 вагон жүкті түсіріп-тиеуге мүмкіндігі бар
Абай облысы бойынша меншікті тілші
Соңғы бірер жылдың көлемінде Семей ЖТ бөлімшесінде логистика және жүк тасымалын ұйымдастыру бойынша тың тәсілдер қолға алынуда. Алғашқы нәтижелер жаман емес. Өткен жылды қорытындылаған бөлімше басшылығы осындай қорытынды жасады.
Бөлімше басшысының логистика жөніндегі орынбасары Болат Өтегеновтің айтуынша, көптеген кедергілерге қарамастан өткен жылы жүк тиеу көрсеткішін арттыру 104 пайызға орындалған. Ал, биылғы жоспар бұдан да көлемді болып тұр. Оған қол жеткізу үшін логистика саласының мамандары статистикалық жүктемені арттыру бойынша тың шаралар қабылдауда. Атап айтсақ, жергілікті вагон айналымын ширатып, бір жүк тиеу операциясын жүзеге асырудағы контейнерлік пойыздарды сұрыптауды қайта қарастыруды жүзеге асырмақ.
Мәселен, техникалық жоспардың артығымен орындалуы үшін бұл жұмыстардың маңыздылығы зор екендігі өткен қаңтар айындағы көрсеткіштер бойынша толық дәлелденіпті.
Айта кетерлігі, бұл шараларды жүзеге асыру барысында жоспардан тыс жұмыстар да орын алуда. Мәселен, Суықбұлақ пен Жаңғызтөбе станцияларынан жол құрылысына арналған жүктерді тиеуге берілген тапсырыстың бірден артып кетуінен жүктеме көлемі күрт өскен. Жүк станцияларындағы техникалық процесс барысында мұндай жағдайлар да ескеріледі. Болат Өтегеновтің айтуынша, өткен жыл мен биылғы қаңтар айы бойынша тиелген жүк ішінде бидай мен ұн өнімінің артып отырғаны байқалады. Өткен жылы оның орындалуы алдыңғы жылмен салыстырғанда 174 пайызға өскен. Ұн өнімдері негізінен Шығыс Еуропа мен Орта Азия елдеріне жөнелтілген.
Сол тәрізді жүк жөнелтуші «Алам Сервис» ЖШС-нің тапсырысы аясында түсті металл көлемі де айтарлықтай ұлғайған. Мұның барлығы биылғы атқарылар шаралар үшін елеулі жүктеме болары анық.
Дегенмен жүк айналымы бойынша анықталған кемшіліктер де жоқ емес. Бұл жайт, әсіресе, станция басы аса қауырт саналатын Жаңа-Семейде байқалған. Атап айтсақ, «Жылукоммунэнерго» МКК-нің өздеріне тиесілі көмір тиелген вагондарды қабылдап алудағы мимырт қимылы біраз бөгет болған. Бұл жайттар өткен жылдың қараша-қаңтар айларында тіркеліпті. Қазіргі күні бұл станция қызметкерлері олқылықтың алдын алу шараларын ойластырып жатыр. Тіркелген жайттың барлығы ағымдағы жылғы бөлімше көлемінде жүргізілетін техникалық процесс барысында толықтай ескеріліп, оң қорытынды шығарылуы тиіс. Жүргізілген талдау мен сараптама осыны міндеттейді.