Маңғыстау станциясы алғашқы тоқсанда жоспарды асыра орындады
Маңғыстау облысы бойынша меншікті тілші
Жыл басынан бергі үш айда Маңғыстау станциясының қабылдау көрсеткіштері жоғарылаған. Станцияға жүк теңіз жолымен Құрық және Ақтау порттарынан келсе, Болашақ арқылы Түркіменстаннан және басқа станциялардан жеткен жүк қабылданып, жөнелтіледі.
Бүгінгі таңда теңіз бен теміржол түйіскен дәліз рөлін атқарып отырған түбектегі станцияда жұмыс қызып тұр. Бірінші тоқсанда станцияға келген пойыздар саны артқан. Тек наурыз айындағы вагон айналымы 27 960, жалпы үш айда 73 466 вагонды құраған.
Тоннаға шаққанда наурызда Маңғыстау станциясы арқылы 99 875 тонна, ал үш айда 220 165 тонна жүк өтті деген сөз. Өткен жылмен салыстырғанда былтырғы үшінші айдағы 698,7 орташа тәуліктік вагон айналымы биыл 901,93 вагонға дейін көтерілген. Жылдың алғашқы үш айындағы орташа көрсеткіш болса 2427,03 тоннадан 2446,27 тоннаға өскен.
– Қазір құрлық жолымен де, су жолымен де түрлі мемлекеттен келетін жүк көбейген. Станцияның өткізу көрсеткіштері күннен күнге жоғарылауда. Биылғы наурыз айына пойыздарды қабылдау жоспары тәулігіне 15 пойыз болатын. Біз іс жүзінде 16,25 пойызға қызмет көрсеттік. Бірінші тоқсанда жоспардың орындалуы 13,33-тен 15,35 пойызға жетті. Бұл тек қабылдауға қатысты. Жөнелтуге келсек, өткен айда күніне жоспардағы 15 пойыз емес, 17,19 пойыз жіберілді. Соңғы үш айда бұл меже 115,4 пайызға орындалды, – деп ақпар берді Маңғыстау станциясы бастығының міндетін атқарушы Бақыбай Исатаев.