Құрық порты паром кешенінде 4 айда жарты миллионға жуық жүк өңделген
«Қазақстан теміржолшысы» газетінің тілшісі
Үстіміздегі жылдың басынан бері Құрық порты паром кешені арқылы жүк өңдеу көлемі айтарлықтай өскен. Өткен төрт ай ішінде 154 кеме – 491 387 тонна жүк өңделген.
Бұл көрсеткіш өткен жылдың сәйкес кезеңімен салыстырғанда 90 % артық. Негізінен, Құрық порты арқылы Қазақстаннан мұнай өнімдері, тыңайтқыштар, металл химикаттары, халық тұтынатын тауарлар экспортталады. Ал импорттық тауарлар қатарында азық-түлік, өнеркәсіптік құрал-жабдықтар, тоқыма, электроника, құрылыс материалдары және басқа да тауарлар бар.
Еске сала кетсек, порттың қазіргі инфрақұрылымы төрт паромға бір уақытта қызмет көрсететін теміржол және автомобиль айлақтарымен бөлінген. Теміржол айлақтарының өткізу қабілеті жылына 4,1 млн тоннаны құрайды. Бір деңгейлі паромды өңдеудің толық циклінің орташа уақыты 6-8 сағатты, ал екі деңгейлі паромды өңдеудің орташа уақыты 10-12 сағатты құрайды, бұл порт жұмысшыларына тәулігіне 5-8 паромға дейін өңдеуге мүмкіндік береді. Жалпы порт паромдарына 54 вагонға дейін сыяды.
Бүгінде Құрық порты Транскаспий халықаралық көлік бағдары тізбегінде жетекші орын алады.