Атырауда жүк тасымалы төмендеп кетті

Негізгі табыс көзі мұнай тасымалы болып табылатын Атырауда тасымал көлемі бұрынғы қалпынан төмендеп бара жатқаны жасырын емес. Атырау жүк тасымалы бөлімшесі бойынша төрт айда көрсеткіштер кеміп кеткені осыны айғақтайды.

Айталық, жүк айналымы 997 млн ткмнетто болып 76,1%-ды құраса, жүк тиеу 1115 мың тонна болып, 77,8%-ды құраған. Әйтсе де, негізгі қызмет бойынша (тасымал арқылы) қаржылай табыс көлемі былтырғы жылғы осы уақытқа қарағанда 33,4%-ға жоғары болып отыр. Бөлімшенің өндірістік-техникалық бөлім басшысы Әзиз Айжарықовтың түсіндіруінше, жоспар бойынша көрсеткіштердің межеден төмен болуына орташа жүк тиеудің және тиелген жүк вагондарының кеміп кетуі, транзиттік тасымалдың азаюы себеп. Мәселен, «Теңізшевройл», «Батыстрансгрупп», «Тенгизская Транспортная Компания», «Исткомтранс», «РТС Холдинг» компаниялары тарапынан 22912вагон/1283072 тонна пропан, бутан, мазут, кокс, сера, ксилол тиеу азайып кетті, өйткені жүктерді экспортқа тиеуге конвенциялық тыйым қойылған. Сонымен қатар ішкі-сыртқы түйіспе жолдар бойынша вагондар саны, пойыз қабылдау да азайып кеткен.  

– Теңдік, Қарабатан, Құлсары станцияларынан Новороссийск-Солтүстік Кавказ темір жолы, Азов, Лужская Вышестеблевская С.Кавказ, ҚХР МГСП Достық-Алашанькоу бағытында жүк жөнелтушілерге конвенциялық тыйым қойылғандықтан Теңдік станциясынан 1188 вагон мұнай өнімдері, Құлсары станциясынан 718 вагон күкірт, Қарабатан станциясынан 180 вагон күкірт өнімі тиелмей қалып, жалпы жүк тиеу көлемін азайтқан. Сол тыйым әсерінен, экономиканың негізгі бөлігін құрайтын өңірдегі мұнай өнімдерін өндіру, оны тасымалдау көлемі, құрылыс материалдары мен халық тұтынатын, басқа да тауарлар тасымалы да қалыпты деңгейді тұрақтай алмағанын айта кеткен жөн. Соның ішінде ресурсұстаушылардан қара мұнай өнімдеріне деген тапсырыс бұрынғыға қарағанда төмен болғанын көреміз. Оған нарықтағы ауқымды дағдарыс, мұнай бағасының тұрақсыздығы, өнімнің болмауы және сатып алушылардың төлемқабілетсіздігі де себеп, – деп түсінік берді өндірістік-техникалық бөлім бастығы.    

Сонымен қатар өңірде темір жолдарды күрделі жөндеу жұмыстары жүріп жатыр, соған орай «толаскез» алынады, кей жерлерде шпалдардың ескілігі мен (Атырау-Қиғаш) жолдың нашарлығынан жылдамдықты шектеуге тура келеді. Мұндай жағдайда жүк айналымымен қоса, жүк тиеу, жүк вагоны өнімділігі, вагонның орташа тәуліктік жүрісі, вагонның статистикалық салмағы, бір жүк операциясына вагонның тұруы, локомотив жүрісі, пойыздың учаскелік жылдамдығы, пойыздар қозғалысының техникалық жылдамдығы сынды басқа да көрсеткіштер төмендейді. Техникалық жоспарға келсек, жүк тиеу көлемі 108,3 пайызға орындалып, 299 мың тоннаға артқан. Соның ішінде вагонның орташа статистикалық салмағы 100,6%,  динамикалық салмағы 100,1, жүк вагондарының тиелген вагондарға шаққандағы жүрісі 100,4%-ға орындалып, өлке теміржолшыларының жоспар межесінен шығып, тасымал көлемін арттыруға әрекеттеніп  отырғандығын көрсетеді.