Логистикалық компаниялармен ынтымақтастық туралы меморандумдарға қол қойылды
«Қазақстан теміржолшысы» газетінің тілшісі
Мемлекет басшысының «Қазақстан темір жолы» ұлттық компаниясын көліктік-логистикалық компанияға айналдыру жөніндегі тапсырмасын орындау аясында Жол картасы әзірленіп, бекітілді.
Құжатта бірнеше бағыттағы іс-шаралар жүйеленген. Олар компания құрылымындағы өзгерістерге, цифрландыруға, жаңа өнімдер мен қызметтерді қалыптастыруға және компанияның қатысу географиясын кеңейтуге қатысты болып отыр.
Стратегиялық мақсаттарды жүзеге асыру үшін Компаниядағы логистикалық блок күшейтіліп, көлік логистикасының құзыретті орталығы мен мультимодальды тасымалдау департаменті құрылды. Олардың негізінде темір жол әкімшіліктерімен және ірі халықаралық көлік-логистикалық компаниялармен келіссөздер сәтті жүргізілді. Логистикалық компаниялармен (ADP, DB, Shandong Port Group) ынтымақтастық туралы меморандумдарға қол қойылды.
Қазір Қазақстанда сауда тораптарын құру мәселелері пысықталуда. Сондай-ақ жаңа құзырет орталықтарын қалыптастыру бойынша жұмыстар жалғасуда. Сонымен қатар келешекте Қытай мен Еуропа аумақтарында логистикалық қызмет көрсету үшін ұлттық компания бөлімшелерін ашу жоспарланып отыр. Бұл Қазақстан арқылы өтетін транзиттік жүктерді қайта бағдарлауға өз әсерін тигізбек.
Бүгінгі таңда компания бизнес-процестерді цифрландыру мәселесіне ерекше ден қойып отыр. Осы ретте PSA International жетекші трансұлттық логистикалық компаниясымен бірлесіп, «ҚТЖ» ҰК» АҚ ақпараттық жүйелерін және Calista жеткізу тізбегін басқаруға арналған сингапурлық онлайн платформасын біріктіру жұмыстары жүргізілуде. Цифрлық шешімді Транскаспий халықаралық көлік бағдарында қолдану жоспарлануда. Жаңа жүйе тұтынушылар үшін сапалы әрі ыңғайлы қызмет түрін жасап, халықаралық тасымалдаушылар үшін бағыттың тартымдылығын арттырмақ. Ал HUAWEI компаниясымен ҚТЖ арасында цифрландыруды дамыту туралы меморандумға қол қоюы компанияның жарқын келешегін айқындай түседі.