Қытаймен арадағы жүк тасымалы 1 млн тоннаға артады
«Қазақстан теміржолшысы» газетінің тілшісі
2024 жылдың қаңтарынан бастап Қытай тарапы Алашанькоу станциясы бойынша астық тасымалдағыштарда, жабық вагондарда және контейнерлерде астық жүктерін қабылдауды екі есеге арттырмақ. Сонымен қатар қазақстандық тараптың өтініші бойынша ҚХР алғаш рет «Қорғас» станциясында астық тасымалдағыштар мен жабық вагондарда астық жүктерін қабылдауды бастайды.
Сондай-ақ қазақстандық экспорттаушылардың тілектерін ескере отырып, өсімдік майы, металл рудалары (түйіршіктер, концентраттар), мұнай коксы сияқты жүктерді қабылдау артпақ. Бұл туралы жақында Шымкент қаласында өткен Қазақстан мен Қытай шекаралық теміржолдарының аралас комиссиясының 32-ші кезекті кеңесінің хаттамасына қол қоюға арналған жиында белгілі болды. Осы отырыста екі елдің теміржол әкімшіліктерінің өкілдері 2024 жылға арналған тасымал көлемін 27,8 млн тонна жүк мөлшерінде орындауға келісті. Бұл көрсеткіш 2023 жыл көлемінен 1 млн тоннаға артық болмақ.
Кездесуде Қытай мен Қазақстан арасындағы 2023 жылдың 8 айындағы жүк және контейнерлік тасымалдаудың қорытындысы шығарылып, жыл соңына дейін 26,8 миллион тонна жүк деңгейінде тасымалдау көлемін сөзсіз орындау туралы келісімге қол жеткізілді. Яғни биылғы жылы тасымалданатын жүк көлемі 2022 жылғы деңгейден 3,6 млн тоннаға жоғары болмақ. Осы ретте экспорт 25%-қа немесе 16,2 млн тоннаға, ал импорт – 6%-ға, немесе 10,6 млн тоннаға дейін артады деп көзделуде.
Сондай-ақ тараптар шекаралық станциялар мен Достық – Мойынты, Алашанькоу – Дзинхэ учаскелерінің өткізу қабілетін кеңейту, терминалдарды салу және жаңғырту бойынша іс-шаралардың барысын талқылады. Кездесу барысында шекаралық бекеттердегі жүк ағынын арттыруға мүмкіндік беретін барлық мәселелер шешілді.