Жүктердің сақталуы мен межелі жерге уақытылы жеткізуде көрсеткіш жақсы

Семей ЖТ бөлімшесі өткен жылы 1394 шақырымдық телімі бойында қауіпсіздікті қамамасыз етумен қатар тасымалданатын жүктердің сақталуы мен межелі жерге діттеген уақытында жеткізуде жақсы көрсеткіштерге жетті.    

Бұл бағыттағы жұмыстар биыл да жалғасып, жүктер мен нысандардың сақталуы бойынша жүйелі іс жүргізілуде. Жуырда бөлімше директоры міндетін атқарушы Алмас Сейсемқановтың төрағалығымен Семей, Өскемен-1 станцияларындағы желілік полиция қызметкерлерінің «ӘТЖК» ЖШС Семей филиалы басшылығының қатысуымен ағымдағы жылғы тасымалданатын жүктердің қауіпсіздігін қамтамасыз ету бойынша селекторлық кеңес өткізілді. Жиынға логистика саласының мамандары да қатысты.  

Жиында өткен 2 жылғы жұмыс қорытындысы да шығарылып, алдағы міндеттемелер қатары сөз болды. Соның ішінде әсіресе күзетке алынатын пойыздар мен вагондарды межелі станцияларға кедергісіз жеткізу, филиал қарамағындағы нысандарда сапалы күзет жұмыстарын жүргізу мәселесі кеңінен талқыға түсті. Бұл орайда желілік полиция мен әскерилендірілген күзет қызметі орын алған қылмысты ашу мен құқықбұзушылықтың алдын алу бойынша бірлескен жұмыстар жүргізуде екен. Әсіресе тәуліктің түнгі мезгіліндегі қауіпсіздік шаралары күшейе түскен. Күзету, қадағалау жұмыстары, сондай-ақ шекара маңындағы станцияларда да жоғары деңгейде. Соның нәтижесінде өткен жылы желі бойында кездесетін ұрлық, тонау сынды фактілер айтарлықтай төмендеген. Бұл орайда әсіресе «ӘТЖК» ЖШС филиалының мобильді шұғыл әрекет ету тобының күзетшілері желі бойында белсенді жұмыс жүргізуде. Ал желілік полиция құқықбұзушылық фактілерінің алдын алу мақсатында түрлі қауіпсіздік акцияларын, рейдтік шараларды жиі ұйымдастырады.

Айта кетер жайт, қазіргі таңда бөлімше бойынша цистерналарда сақталатын қауіптілігі аса жоғары жүктері бар жылжымалы құрамдар бөлімшенің барлық станцияларында дерлік арнайы қадағалауға алынған. Тасымалдағы жүкті діттеген жеріне аман-есен жеткізу тек күзет қызметінің ғана емес, станциялардағы теміржолшылардың да негізгі міндетіне кіретіні белгілі.

Жиынды қорытындылаған бөлімше басшысы Алмас Ғылымұлы желі бойындағы барлық құрылымдық бөлімшелер қауіпсіздік жолында бірлесе жұмыс жүргізіп, ортақ нәтиже шығаруы қажеттігін айтты.