Семейде жүк операциялары жүйелі жүргізілуде
Абай облысы бойынша меншікті тілші
Осы жылы Семей ЖТ бөлімшесі бойынша контейнерлік тасымал біршама артып отыр. Сәйкесінше жергілікті теміржолшылар қауымы жүк тасымалының осы түріне айрықша басымдық беруде. Атап айтсақ, барлық тораптық станциялардағы жүк операцияларының ішінде жекелей тәртіппен қарастырылып, өндіріс барысына айрықша маңыздылық беріледі.
Бір ғана мысал, соңғы жылдар көлемінде контейнерлік тасымал қарқыны еселеп өскен. Мәселен, кластан тыс Семей станциясы бойынша өткен бір аптаның ішінде 1490 тонна жүк тасымалданған. Бұл қазіргі таңда орташа көрсеткіш саналады. Ал іргелес Жаңа-Семей жүк станциясындағы көрсеткіштер бұдан да жоғары. Қос станцияға келетін контейнерлік жүктердің басым бөлігін негізінен автобөлшектер, азық-түлік тауарлары құрайды екен.
Контейнерлер негізінде көршілес ҚХР елінен, Достық станциясынан және Ресейдің Алтай өлкесінен келеді. Тасымалдың осы түрі бойынша жүк операцияларын жүргізу үшін әр станцияда жекелей тауар кассалары бекітілген.
– Контейнерлік тасымал бойынша Семей паркінде әсіресе жүк түсіру ісі күннен күнге ұлғайып келеді десе болады. Тіпті кейбір күндері екі мәрте вагондарды таратып шығамыз, – дейді Семей станциясының тауар кассирі Айгүл Рахиянова.
Бұл ретте семейлік қозғалысшылардың басты міндеті вагондарды әзірлеу, пойыздарды сұрыптау процестерін ширату және клиенттер жүктерінің қауіпсіз жеткізілуін қадағалау болып отыр.
Бір бұл емес, бүгінде бөлімше бойынша аталмыш жүк түрінің транзиті де артқан. Осынау орайда күндері семейлік теміржолшылар қауымы 600-ден 800-ге дейінгі аралықтағы контейнер тиелген транзиттік пойыздарды кедергісіз өткізуге мүмкіндік алған. Трансшекаралық аймақ үшін бұл аса маңызды. Тіпті жаз мезгіліндегі Үшбиік – Жарма – Жаңғызтөбе телімдері бойынша жүргізілген 65 шақырымдық күрделі жөндеу мен орташа жөндеу жұмыстары кезіндегі толаскездерде де ешқандай іркіліс, кестеден кешігу туған жоқ.
Ұлттық компания ҚХР бағытында қазақстандық тараптың өткізу мүмкіндігін арттыру мақсатында келергі 2025 жылы «Достық-Мойынты» учаскесінде екінші жолдың құрылысын аяқтауды көздеп отырғаны белгілі. Демек, бөлімше бойынша контейнерлік тасымал түрі де қарқын алары анық.