Семейде көмір тасымалы артты

Ел шығысындағы Семей ЖТ бөлімшесі бойынша көмір тасымалы қарқын ала бастады. Жүк айналымының басым бөлігін қамтитын бұл жүк түрі жазда да тасымалданғанымен, сұраныстың артуына байланысты қыркүйек айынан бастап кең қарқын алуда. Осы ретте негізгі салмақ Дегелең, Жаңа-Семей тораптық жүк станцияларына түсуде.

Семей ЖТ бөлімшесінің логистика және жүк тасымалын ұйымдастыру бөлімі мамандарының айтуынша, биылғы жылу маусымы кезеңіндегі облыс халқының көмірге деген жалпы қажеттілігі 567 мың тоннаны құрайды екен. Жалпы аймақ бойынша 15 көмір өткізу пункті, соның ішінде 11 теміржол тұйығы және 4 ірі қойма бар. Осыған байланысты 32 көмір операторы жұмыс істейді. Көмір жеткізілімі теміржолшылар тарапынан бақылауға алынған. Алдағы уақытта тәулік сайын құрастырылатын пойыздар саны арта бермек. Бүгінде Дегелең станциясынан 6-8 пойызды жасақтап аттандыруға толық мүмкіндік бар. Көмір жеткізілімі келіп түскен тапсырысқа сай орындалуда. Мәселен, бүгінгі таңда Жаңа-Семей станциясының теміржолшылары қызмет көрсететін «ВостокУгольПром» теміржол тұйығында 300 тоннадан астам көмір бар. Тәулігіне ең кемі 9 вагон қатты отын түсіріледі. Көмір бағасы үйге дейін жеткізіп беруді қоса алғанда тоннасына 17 500 теңгені құрайды. Бұл – күллі республика көлеміндегі ең арзан баға.  

Сала мамандары биылғы тамыз айынан бастап қарқын алған қатты отын тасымалы штаттық режимде жүзеге асырылып жатқанын атап өтті. Тасымал үдерісінің барлық сатысынан бастап көмір операторларының жұмысы арнайы құрылған жұмыс тобының назарында тұр. Облыстық әкімдіктің бастамасымен аймақтағы бюджеттік ұйымдарға көмірді 15 қыркүйекке дейін толық жеткізу міндеттелген. Осы ретте алдағы жылыту маусымы кезеңінде өңірде тәулік бойы жұмыс істейтін Call-орталықтар ашу да көзделіп отыр.  

Қазіргі таңда жергілікті теміржолшылар қауымы тұрғындарға қазан айының басына дейін отын қорын толық жасақтау қажеттігін түсіндіруде. Алдағы 2025-2026 жылдардағы жылыту маусымына көмірді ерте сатып алу, тек жылу қауіпсіздігін қамтамасыз етіп қана қоймай, маусым басталғанда туындайтын ұзын-сонар кезектің, көмір тапшылығы мен бағаның өсу қаупін болдырмауға да көмектеседі. Сондықтан көмір сатып алуды кешіктірмей, қазірден бастап қолға алған жөн. Бұл қадам тұрғындарға да, көмір жеткізуші теміржолшылар қауымына да қолайлы.  

Жалпы синоптиктердің болжамы бойынша биыл шығыста қыс ерте түсіп, аяз қатты болады деген болжам бар. Осыған орай аймақтағы бюджеттік және бюджеттік емес нысандардың жылыту маусымына дайындығы қатаң бақылауға алынуда. Семейлік теміржолшылар ел шығысын толықтай қатты отынмен қамтуда кедергілер туындамайды деген сенімде.