Қазақ-түркімен шекарасында сауда саттық қыза түсті

Түркіменстанмен шекаралас Болашақ станциясында қазақстандық және транзиттік жүктер ағыны толассыз өткізілуде. Жыл басынан бергі алты айда аталған мемлекетаралық шекаралық түйісу нүктесі арқылы шетелден 198 пойыз қабылданып, 219 пойыз жөнелтілген. Станция бастығының шұғыл жұмыстар жөніндегі орынбасары Нұрасыл Анарбаевтың айтуынша, пандемияға байланысты қалыптасып отырған жағдайға қарамастан станцияда шетелдерге жүк жіберіп, олардан қабылдау жұмыстары қалыпты жағдайда жүргізілуде. – Маңғыстау табиғатының ерекшелігіне байланысты өлкеде тұтынылатын жеміс-жидектер мен көкөністердің 80 пайызы сырттан әкелінеді. Сондықтан станция арқылы біз қабылдайтын жүктер арасында міндетті түрде жеміс-жидек мол, сонымен қатар картоп, кептірілген жемістер, күкірт, тұрмысқа қажет тұтынатын заттар болады. Ал Қазақстаннан жіберілетін жүктерді негізінен темір құбырлар, бидай, ұн, күнбағыс майы, қара металл, кесілген ағаш материалдары, жүк авто көліктері құрайды, – дейді станция бастығының орынбасары. Былтырдан бері COVID-19 коронавирус індеті таралуының алдын алу үшін пойыздарды қабылдау мен өткізу тәртібі өзгертіліп, екі ел теміржол әкімшіліктерінің келісімі бойынша жүк пойыздарын қабылдау кезінде Түркіменстан мен Қазақстан теміржолшыларының байланысын барынша болдырмай отырып, жұмыс жүргізіліп келеді. Станцияда алдын алу жөніндегі барлық шаралар қабылданған. Жұмысшыларға маскалар, антисептиктер, респираторлар, қолғаптар берілген. Жұмыс орындары зарарсыздандырылуда, техникалық сабақтар мен кеңестер онлайн режимінде өткізілуде.