Қазақстан ауған еліне астық жөнелтуден қауіптеніп отыр
«Қазақстан теміржолшысы» газетінің тілшісі
ҚР Қаржы министрлігі мемлекеттік кірістер комитетінің мәліметтері бойынша былтыр Қазақстаннан Ауғанстанға 527 мың тонна бидай экспортталған. Астықтың басқа түрлерінен 12 мың тонна, майлы дақылдар 31,6 мың тонна, ұн 1 млн 150 мың тонна жөнелтілген, деп хабарлайды Rail-news.kz. Ал биыл бірінші жартыжылдықта ауған бағытына қарай 328 мың тонна бидай, басқа түрлері 3,6 мың тонна, майлы дақылдар 9,4 мың тонна және ұн 430 мың тонна жіберілген. Алайда бүгінде Ауғанстандағы алмағайып жағдай қазақстандық астық трейдерлерін алаңдатып отыр. Егін науқаны аяқталып, астық жөнелтетін мезгіл таяп келеді, яғни жылдағыдай экспортқа астық шығарылатын кез. Соның ішінде осы ел – астық сұранысы жоғарылап келе жатқан бағыт болатын. Енді Қазақстаннан астық жөнелтетіндердің жағдайы қалай болатыны белгісіз. Әрине, елде астықтың шығымы жылдағыдай емес, биылғы қуаңшылыққа байланысты аз өнімді экспорттау мөлшері де азаятыны белгілі. «Астық Транс» кәсіпорнының басшысы Жандос Қуанышевтің айтуынша, егер осы бағытта вагондар айналымы төмендер болса, соған сәйкес шешім шығарылып, ол жаққа жіберілген вагондар қайтатынына көз жетпегендіктен, вагондар жөнелтуді тоқтатады. Сондықтан тәуекел жоғарылаған жағдайда ауған еліне жүк тиеуден бас тартуды да көздеп отыр.