Семейде астық және көмір тасымалы науқанына орай жүк айналымын реттеуге кірісіті
Абай облысы бойынша меншікті тілші
Семей жүк тасымалы бөлімшесінде жүк айналымы бойынша өндіріске тың шаралар енгізіліп жатыр. Соның ішінде ең бірінші кезекте жергілікті вагон шаруашылығына қатысты мәселелер күн тәртібіне қойылуда. Оған себеп те жоқ емес. Бөлімшедегі көрсеткіштерге бірден-бір ықпал ететін шаралар негізінен вагон айналымына тікелей байланысты. Мәселен, өткен жартыжылдықтың есебі бойынша жүк айналымының 107,1 пайызға артуы себепті учаскелік жылдамдықты 2,69 км/сағ.-қа төмендету қажет болған. Бұл ретте белгіленген жылдамдық мөлшеріне біршама өзгертулер де енгізілді. Сонымен қатар, қазіргі уақытта бөлімше аумағындағы аралық станцияларда пойыздардың кідіріп қалу фактілері де тіркелуде. Дегенмен бұл олқылықтың орнын қозғалыстағы сағат санының артуы толтырып отыр. Дегенмен, өзге бөлімшелермен шектесетін Локоть, Дегелең, Жүзағаш станцияларында «тастанды пойыздар» қалыптастырмау және жылжымалы құрамдарды кестеден кешіктірмеу үшін бірқатар жаңашыл бағытта жұмыс жүргізудің қажеттілігі туындап отыр. Бұл орайда транзиттік пойыздарды техникалық станцияларда бөгелтпей жөнелту біршама тиімділік әкеліп отыр. Себебі, қазіргі таңда көмір және астық тасымалының күрт арта бастауы бөлімше бойынша жүк айналымын толық реттеп үлгеруді қажет етуде. Мәселен, өткен айларда Достық станциясына жөнелтілетін жүк пойыздарының уақытында қабылданбауы біршама қиындық тудырған болса, қазіргі таңда бұл мәселе біртіндеп шешімін тауып келеді. Бүгінде бөлімше бойынша вагон айналымы нақты жоспар аясында жүргізілуде. Өткен жартыжылдықта көршілес бөлімшелердің кейбір жылжымалы құрамдарды қабылдамауынан бірқатар келеңсіздіктер туындаған болса, бүгінде вагон паркіндегі қарбалас белгіленген межені толық орындалуға сеп болуда. Сонымен қатар,техникалық жылдамдық 44,15 км/сағ. болып отыр. Дегенмен қазіргі таңда бөлімше диспетчерлері негізгі күшті бос вагондарды дер кезінде жинап алуға, жүк пойыздарын жылдам құрастырып жолға шығаруға салуда. Бұл ретте станциялардағы кірме жолдардағы қозғалыс жиілігі де артқаны байқалады. Жалпы, аталмыш бағыттағы өткен жартыжылдықта орын алған жайттар аса алаңдаушылық туғыза қоймағанымен, семейлік теміржолшылар бұл тараптағы олқылықтардың орын алмауына күш салуда. Дегенмен, пойыздар қозғалысында көп жайт көршілес бөлімшедегі әріптестерге де байланысты. Сонымен қатар, ережеге бағынбайтын, мамандар қызметінен тыс жататын факторлар да кедергі болуы бек мүмкін. Әйтсе де, бүгінде Шығыстағы қозғалысшылар мен вагон шаруашылығының мамандары таяу болашаққа оптимистік көзқараста. Соңғы жартыжылдық көрсеткіш бойынша діттеген межеге жететіндеріне толығымен сенімді. Оған мүмкіндік те, кәсіби қабілет те жеткілікті. Яғни, жүк айналымын ширату жолындағы вагон өнімділігін арттыру, динамикалық жүктеме, жергілікті вагондарды өңдеу ісінде жоспарлар толық орындалып, жаңа көрсеткіштерге қол жеткізіледі деп күтілуде.