Жылу беру маусымы кезіндегі көмір тасымалы жоспарға сай жүріп жатыр

Жылыту маусымына дайындық аясында 1 мамырдан бастап бүгінгі күнге дейін теміржол көлігімен 40 млн тоннаға жуық көмір тасымалданған. Бұл туралы Орталық коммуникациялар қызметінде «Жылыту маусымында халықты көмірмен қамтамасыз ету: қатты отынмен биржалық сауданың нәтижелері» тақырыбымен өткен брифингте ҚР ИИДМ Көлік комитеті төрағасының орынбасары Жәнібек Тайжанов мәлімдеді. Оның айтуынша, қыркүйек айынан бастап жоспар 98 мың тоннаға, яғни 1%-ға асыра орындалыпты. Өткен жылға қарағанда 245 мың тоннаға артық тиелген. Қыркүйектің 27 күнінде жалпы көмір тиеу 7,9 млн тоннаны құрап отыр.

– Республика бойынша 200 теміржол тұйығы көмір тасымалына қатысуда. Биыл жоспарланған 500 мың тоннаның 200 мың тоннасы сатылды. Осы саудаға қатысқан әрбір теміржол тұйығына барып, баға туралы жоспарлар анықталды. Оның иелері тікелей өндірушіден алса, әлдеқайда арзан екеніне көз жеткізіп отыр. Биыл осы 10 пайыз көмір бойынша қымбатшылық болмайды деген болжам бар, – деді екінші спикер, ҚР Бәсекелестікті қорғау және дамыту агенттігі төрағасының орынбасары Болат Самбетов.

Қазіргі уақытта Қазақстан аумағында 64 мыңнан астам ашық вагон жұмыс істейді. Оның 35 мыңы немесе 55%-ы көмір тасымалдауға тартылған. Соның ішінде «Қазтеміртранс» АҚ меншік паркінде – 21 мың ашық вагон, оның ішінде көмірге – 13 мың, ҚР басқа меншік иелері – 24 мың ашық вагон және 14 мың ашық вагон басқа мемлекеттерге тиесілі. Яғни, паркте аталған кезеңде қажетті көмір көлемін тасымалдауды қанағаттандыру үшін жартылай ашық вагондар саны жеткілікті. Болжамдарға және көмір тиеудің маусымдылығына сәйкес, тасымалдардың орташа көлемі 4 млн тоннаға дейін өсуі мүмкін, оған «Қазтеміртранс» АҚ-ның шамамен 17 мың вагоны қажет болады. «ҚТЖ» ҰК» АҚ орталық аппаратының жанында көмір тасымалдау жөніндегі штаб, ал жол бөлімшелерінде жедел топтар жұмыс істейді. Олар жүк жөнелтушілермен бірлесіп туындаған барлық мәселелер шешіледі, вагондардың жүк операцияларында тұрып қалуын қысқарту мен айналымның орындалуын бақылайды. Жиынға қатысқан «ҚТЖ-Жүк тасымалы» ЖШС атқарушы директоры Нұржан Келбұғанов Шығыс Қазақстан мен Павлодар облыстарында көмір тапшылығы қалай шешіліп жатқанын айтты. «Аталған өңірлердегі мәселе бойынша біз талдау жасадық. Өскемен қаласындағы «Топливная транспортная компания» теміржол тұйығына көмір тиеу 110 пайызға орындалған. Ал Қаражыра көмір кенішінен жоспар бойынша күніне 8 вагон көмір жөнелтілуде. Мысалы, кеше сол жерден 18 вагон түсірілді. Бүгін 19 вагон түсіріліп жатыр. Сол тұйыққа 23 вагон тағы келе жатыр. Яғни, дәл сол жерге көмір жоспардан артық жеткізіліп жатыр», – деді ол.