Теміржолдағы цифрлық жүйенің жемісі
Абай облысы бойынша меншікті тілші
Биылғы жартыжылдықта Аягөз байланыс және белгі беру дистанциясының теміржолшылары үшін елеулі жаңалықтар орын алды. Атап айтсақ, Ақтоғай станциясынан Шарға дейінгі аралықтағы телім бойына қызмет көрсететін ШЧ-30 мекемесі байланыстың заманауи тәсілі – цифрлық жүйеге толық көшіріліп, озық технологиялармен жабдықталды. Бұл өз кезегінде өндіріс көрсеткіштерін жақсартып, тиімділік пен үнем әкелді.
Жаңа технологияны игеру бағытындағы шараларды жүзеге асыру аягөздік байланысшы-теміржолшылар үшін оңайға түскен жоқ, әрине. Ең алдымен белгілі бір жол айрықтарындағы байланыс құрылғыларын жаңарту қажеттілігі туындапты. Соның аясында бүгінде дистанция қарамағындағы барлық станциялар бойынша теміржолдағы цифрлық жүйе өзегі саналатын DX-500 жедел технологиялық байланыс жүргізу құрылғысы толығымен монтаждалып, орнатылды. Ендігі аралықта бөлімшедегі диспетчерлер байланысы бұрынғыдан да жақсарып, сапа тұрғысынан арта түскен.
Бір бұл емес, жол айрықтарындағы байланысшылар жұмысының сапасын арттыру мақсатында прожекторлық бағдаршамдарды заманауи линзалық белгі беру құрылғыларына алмастыру жұмыстары да жүргізілді. Міне, осы шараның аясында, 30-шы жол айрығындағы СЦБ құрылғысы жаңа модульдік типте гі нысанға ауыстырылған. Бұл жұмыстар өз кезегінде байланыс жүйесін жақсартып қана қоймай, қызмет барысына ыңғайлылық та тудырыпты.
Осы тәріздес жұмыстар желі бойындағы Үшбиік, Таңсық станцияларында да орын алды. Атап айтсақ, тақ және жұп бағыттағы КТСМ-02 жабдықтары да жаңадан салынған модульдерге көшірілген. Сол тәрізді ескірген реле шкафтары заманауи релелік жабдықтарға ауыстырылыпты. Мұндай шаралар Жүзағаш, Егізқызыл, 7-ші жол айрығы, Нарбота станциялары мен 27-ші жол айрығында да орнатылды.
Сонымен қатар, бүгінде желі бойындағы жұмыс сапасын арттыру үшін КТСМ-2 құрылғысының бірліктері қолданылуда. Бұл жабдықтау мен автоматтандыру бойынша қабылданған ауқымды жоспар аясында іске асып отыр. Жаңарту мен жаңғырту бағытындағы іс-шаралар әлі де жалғаса бермек. Оған білікті басшы Айдос Жұлдызбаев жетекшілік ететін аягөздік белгі беру-байланыс дистанциясынынң материалдық-базалық құрылымы толық мүмкіндік береді.
Тоқтала кетер жайт, Жаңғызтөбе, Желдіқара, Көшкентал, Қапанбұлақ, Алтынқолат сынды тағы бірқатар станциялар бойынша КПТШ-515 құрылғысы ТМ-15 пен ТМ-17 құрылғыларына ауыстырылды.